Усебеларускі народны сход – гарант палітычнай стабільнасці і суверэнітэту
Першае пасяджэнне
Аб першым пасяджэнні сёмага Усебеларускага народнага сходу
24 – 25 красавіка 2024 г. адбылося першае пасяджэнне сёмага Усебеларускага народнага сходу.
У сваім новым статусе – канстытуцыйнага органа, якія вызначае стратэгічныя напрамкі развіцця грамадства і дзяржавы, забяспечвае непахіснасць канстытуцыйнага ладу, пераемнасць пакаленняў і грамадзянскую згоду, - Сход прайшоў упершыню.
Пасяджэнне адбылося ў г. Мінску ў Палацы Рэспублікі пад дэвізам «Час выбраў нас!».
Колькасны склад дэлегатаў першага пасяджэння сёмага УНС - 1166 чалавек (гранічная колькасць дэлегатаў у адпаведнасці з заканадаўствам - 1200). У іх ліку 350 прадстаўнікоў ад мясцовых Саветаў дэпутатаў, яшчэ 400 - дэлегаты ад грамадзянскай супольнасці, якія прадстаўляюць пяць буйнейшых грамадскіх аб'яднанняў краіны: Федэрацыю прафсаюзаў Беларусі, Рэспубліканскае грамадскае аб'яднанне «Белая Русь», Беларускі саюз жанчын, Беларускі рэспубліканскі саюз моладзі і Беларускае грамадскае аб'яднанне ветэранаў.
Таксама ў пасяджэнні прынялі ўдзел звыш 700 запрошаных гасцей, экспертаў. На мерапрыемства было акрэдытавана 489 прадстаўнікоў СМІ, у тым ліку замежных выданняў. У прыватнасці, інтарэс да Усебеларускага народнага сходу праявілі мас-медыя з Расіі, Кітая, Турцыі.
У першы дзень пасяджэння дэлегаты сфарміравалі Падліковую камісію, выбралі Старшыню УНС, яго Намесніка і іншых членаў Прэзідыума УНС, зацвердзілі Часовы рэгламент Сходу, прынялі шэраг іншых рашэнняў па пытаннях арганізацыйнага характару.
Старшынёй Усебеларускага народнага сходу выбраны Прэзідэнт Рэспублікі Беларусь Аляксандр Лукашэнка.
Намеснікам Старшыні УНС выбраны Аляксандр Косінец.
Дэлегаты таксама выбралі іншых членаў Прэзідыума УНС.
Імі сталі:
рэктар Беларускага дзяржаўнага ўніверсітэта інфарматыкі і радыёэлектронікі Вадзім Богуш;
генеральны дырэктар РУП «Віцебскаблгаз» Аляксандр Бранцэвіч;
кіраўнік Апарату Савета Міністраў Рэспублікі Беларусь Канстанцін Бурак;
дэлегат ад грамадзянскай супольнасці Надзея Ермакова;
старшыня Гродзенскага аблвыканкама Уладзімір Каранік;
старшыня Пастаяннай камісіі Палаты прадстаўнікоў Нацыянальнага сходу Рэспублікі Беларусь па заканадаўстве Марына Лянчэўская;
дырэктар Рэспубліканскага навукова-практычнага цэнтра анкалогіі і медыцынскай радыялогіі імя М.М. Аляксандрава Сяргей Палякоў;
старшыня Пастаяннай камісіі Савета Рэспублікі Нацыянальнага сходу Рэспублікі Беларусь па міжнародных справах і нацыянальнай бяспецы Сяргей Сівец;
намеснік старшыні Магілёўскага аблвыканкама Руслан Страхар;
суддзя Вярхоўнага Суда, старшыня Рэспубліканскага савета суддзяў Ірына Тылец;
дырэктар ААТ «Гомельскі хімічны завод» Дзмітрый Чарнякоў;
старшыня Беларускага саюза жанчын Вольга Шпілеўская;
старшыня Брэсцкага аблвыканкама Юрый Шулейка.
У сваім выступленні ў гэты дзень Прэзідэнт Рэспублікі Беларусь Аляксандр Лукашэнка падрабязна спыніўся на ролі і месцы УНС у абноўленай палітычнай сістэме краіны, адзначыў сацыяльна-эканамічныя дасягненні суверэннай Беларусі, закрануў актуальныя пытанні ўнутранай і знешняй палітыкі.
У другі дзень пасяджэння дэлегаты разгледзелі і зацвердзілі два дакументы стратэгічнага характару: Канцэпцыю нацыянальнай бяспекі Рэспублікі Беларусь і Ваенную дактрыну Рэспублікі Беларусь. У гэтых дакументах замацаваны базавыя падыходы да забеспячэння бяспекі дзяржавы і грамадства ў розных сферах жыццядзейнасці з улікам геапалітычнай абстаноўкі, якая складваецца, сучасных выклікаў і пагроз.
З дакладамі па праектах названых прававых актаў выступілі Дзяржаўны сакратар Савета Бяспекі Рэспублікі Беларусь Аляксандр Вальфовіч і Міністр абароны Рэспублікі Беларусь Віктар Хрэнін. З дакладам аб існуючых пагрозах у сферы нацыянальнай бяспекі выступіў Старшыня Камітэта дзяржаўнай бяспекі Рэспублікі Беларусь Іван Тэртэль. Па шэрагу актуальных пытанняў у ходзе праведзенай дыскусіі падрабязна выказаўся Старшыня Усебеларускага народнага сходу, Прэзідэнт Рэспублікі Беларусь Аляксандр Лукашэнка.
Практычная рэалізацыя ў ходзе першага пасяджэння ўскладзеных на Усебеларускі народны сход паўнамоцтваў, важнасць і актуальнасць абмяркоўваемых пытанняў пацвердзілі правільнасць стратэгічнага курсу на замацаванне канстытуцыйнага статусу Сходу як вышэйшага прадстаўнічага органа народаўладдзя, які заняў сваё дастойнае месца сярод вышэйшых органаў улады Рэспублікі Беларусь.
