Усебеларускі народны сход – гарант палітычнай стабільнасці і суверэнітэту
Мэты, задачы і кампетэнцыя УНС
Мэты, задачы і кампетэнцыя
Усебеларускага народнага сходу
У адпаведнасці з Канстытуцыяй Рэспублікі Беларусь Усебеларускі народны сход з'яўляецца вышэйшым прадстаўнічым органам народаўладдзя Рэспублікі Беларусь, які вызначае стратэгічныя напрамкі развіцця грамадства і дзяржавы, забяспечвае непарушнасць канстытуцыйнага ладу, пераемнасць пакаленняў і грамадзянскую згоду.
Усебеларускі народны сход прызначаны служыць гарантам палітычнай стабільнасці і суверэнітэту краіны, інструментам кансалідацыі ўсяго грамадства.
Усебеларускі народны сход:
1) зацвярджае асноўныя напрамкі ўнутранай і знешняй палітыкі, Ваенную дактрыну, Канцэпцыю нацыянальнай бяспекі;
2) зацвярджае праграмы сацыяльна-эканамічнага развіцця Рэспублікі Беларусь;
3) заслухоўвае Прэм'ер-міністра Рэспублікі Беларусь аб выкананні праграм сацыяльна-эканамічнага развіцця Рэспублікі Беларусь;
4) прапануе змяненні і дапаўненні ў Канстытуцыю Рэспублікі Беларусь;
5) прапануе правядзенне рэспубліканскіх рэферэндумаў;
6) мае права разглядаць пытанне аб легітымнасці выбараў;
7) прымае рашэнне аб зняцці Прэзідэнта Рэспублікі Беларусь з пасады ў выпадку сістэматычнага або грубага парушэння ім Канстытуцыі Рэспублікі Беларусь або ўчынення дзяржаўнай здрады ці іншага цяжкага злачынства;
8) мае права ўвесці на тэрыторыі Рэспублікі Беларусь надзвычайнае або ваеннае становішча пры наяўнасці падстаў, прадугледжаных Канстытуцыяй Рэспублікі Беларусь, і ў выпадку бяздзейнасці Прэзідэнта Рэспублікі Беларусь па гэтых пытаннях; увядзенне надзвычайнага або ваеннага становішча разглядаецца Усебеларускім народным сходам па ініцыятыве Прэзідыума Усебеларускага народнага сходу або Савета Рэспублікі Нацыянальнага сходу Рэспублікі Беларусь;
9) па прапанове Прэзідэнта Рэспублікі Беларусь, папярэдне ўзгодненай з Прэзідыумам Усебеларускага народнага сходу:
выбірае Старшыню, намесніка Старшыні і суддзяў Канстытуцыйнага Суда Рэспублікі Беларусь і вызваляе іх ад пасады па падставах, прадугледжаных законам;
выбірае Старшыню, намеснікаў Старшыні і суддзяў Вярхоўнага Суда Рэспублікі Беларусь і вызваляе іх ад пасады па падставах, прадугледжаных законам;
выбірае Старшыню і членаў Цэнтральнай выбарчай камісіі і вызваляе іх ад пасады па падставах, прадугледжаных законам;
10) па прапанове Прэзідэнта Рэспублікі Беларусь прымае рашэнне аб магчымасці накіравання ваеннаслужачых, супрацоўнікаў ваенізаваных арганізацый, іншых асоб за межы Рэспублікі Беларусь для ўдзелу ў забеспячэнні калектыўнай бяспекі і дзейнасці па падтрыманні міжнароднага міру і бяспекі;
11) устанаўлівае дзяржаўныя святы і святочныя дні;
12) узнагароджвае Прэзідэнта Рэспублікі Беларусь дзяржаўнымі ўзнагародамі, а таксама прапануе асоб для ўзнагароджвання дзяржаўнымі ўзнагародамі;
13) дае абавязковыя для выканання даручэнні дзяржаўным органам і службовым асобам, атрымлівае інфармацыю ад дзяржаўных органаў і службовых асоб, ажыццяўляе іншыя ўстаноўленыя Канстытуцыяй Рэспублікі Беларусь і законам паўнамоцтвы, неабходныя для рэалізацыі ўскладзеных на яго канстытуцыйных функцый.
Усебеларускі народны сход для рэалізацыі ўскладзеных на яго канстытуцыйных функцый у межах сваёй кампетэнцыі прымае рашэнні. Рашэнні Усебеларускага народнага сходу як акты вышэйшага прадстаўнічага органа народаўладдзя Рэспублікі Беларусь, якія вызначаюць стратэгічныя напрамкі развіцця грамадства і дзяржавы, прымаюцца па найважнейшых пытаннях грамадскага і дзяржаўнага жыцця.
Рашэнні Усебеларускага народнага сходу з'яўляюцца абавязковымі для выканання і могуць адмяняць прававыя акты, іншыя рашэнні дзяржаўных органаў і службовых асоб, якія супярэчаць інтарэсам нацыянальнай бяспекі, за выключэннем актаў судовых органаў.
