Усебеларускі народны сход – гарант палітычнай стабільнасці і суверэнітэту
Інтэрв'ю, публікацыі, меркаванні
Тысяча магчымасцей Антона Мельнікава
У аграгарадку Хутар Антона Мельнікава ведае кожны. Малады і дзейны дэпутат Баравікоўскага сельскага Савета дэпутатаў, майстар буравой Светлагорскага ўпраўлення буравых работ РУП «ВА Беларуснафта», дэлегат VII Усебеларускага народнага сходу сваім прыкладам пацвярджае мудрае выслоўе, што «жаданне – гэта тысяча магчымасцей, нежаданне – тысяча прычын». Ніводнае даручэнне або агучаную праблему з боку насельніцтва Антон Мельнікаў не пакідае без увагі. А іх, паводле яго слоў, у людзей збіраецца шмат. І хоць, на першы погляд, яны могуць падацца не такімі ўжо і сур'ёзнымі, тым не менш вырашыць яе самастойна чалавеку бывае складана. І за дапамогай ён ідзе да дэпутата.
Выбар людзей
Пайсці ў дэпутаты Баравікоўскага сельскага Савета дэпутатаў Антона Мельнікава пераканалі людзі. Сам ён асабліва не думаў пра такую дзейнасць. Вахтавы графік работы ў ВА «Беларуснафта», дамашнія клопаты, сям'я, дзеці – усё разам гэта займае вельмі шмат часу. Тут яшчэ набыў у аг. Хутар дом, стаў яго абжываць.
Праз час само сабой паўстала пытанне: чаму б не правесці ў населены пункт газ? Ідэя гэта жыла ў Хутары даўно, вось толькі чамусьці не асабліва развівалася. Антон Мельнікаў пагаварыў з людзьмі на гэту тэму і знайшоў гарачую падтрымку.
– Мне даручылі весці дзелавую частку, вырашаць пытанне газіфікацыі на ўзроўні райвыканкама і адпаведных службаў.
Ён збіраў неабходныя пакеты дакументаў, хадзіў па кабінетах, актыўна вырашаў пытанні ў рамках нацыянальнай заканадаўчай базы. Жыхары Хутара натхнёна дапамагалі, і справа стала паступова набіраць абароты.
А калі настаў час выбараў у мясцовы Савет дэпутатаў, кандыдатуру Антона Мельнікава адобрылі літаральна ўсе. У сельскай мясцовасці крытэрый ацэнкі чалавека адзін – гэта дзейнасць і здольнасць вырашаць пытанні. А ў Антона, і гэта бачылі ўсе, словы не разыходзяцца са справай. Калі сказаў, значыць зробіць.
Іншая справа, як сам Мельнікаў успрыняў такі давер да сябе з боку вяскоўцаў. Бо можна было адмовіцца, займацца толькі домам або газавым кааператывам, які да таго часу аформіўся і пачынаў кардынальна вырашаць пытанні газіфікацыі.
– Мая такая пазіцыя: калі я тут жыву, значыць я нясу адказнасць за тое, што вакол мяне адбываецца. І калі гэта магчыма, абавязаны рабіць так, каб жыць было лепш і камфортней.
«Галоўнае – слухаць і чуць людзей». Так Кіраўнік беларускай дзяржавы Аляксандр Лукашэнка вызначае форму работы з насельніцтвам, каб лепш даведацца пра праблемы людзей і правільна іх вырашаць. Малады дэпутат сельскага Савета Антон Мельнікаў цалкам падтрымлівае гэту формулу, пацвярджаючы яе эфектыўнасць на ўласным прыкладзе. «Для людзей, асабліва ў сельскай мясцовасці, вельмі важна быць пачутымі, – падкрэслівае Антон Мельнікаў. – Некаму можа падацца, што падтоплены двор, або нерэгулярны вываз смецця, або беспарадак на грамадзянскіх могілках не такая ўжо і вялікая праблема. Але для сельскага жыхара, які прывык да парадку, жыве на сваёй зямлі і ўкладвае ў яе частку сваёй душы, балюча глядзець на такія моманты. Яны прыходзяць да мяне, мы разам вырашаем, як можна выправіць становішча. Па магчымасці падключаецца старшыня Баравікоўскага сельсавета, калектыў мясцовай гаспадаркі. І калі разумееш, што ўдалося вырашыць пытанне, становіцца зразумела, наколькі важна гэта грамадская нагрузка – дэпутацкая дзейнасць».
У партнёрстве з дзяржавай
На думку Антона Мельнікава, удасканаленне інфраструктуры безумоўна выводзіць любы населены пункт на новы віток развіцця. Сёння ў аграгарадок Хутар падведзены газ, тут мадэрнізавана электразабеспячэнне, што дае чалавеку выбар, чым карыстацца ў побыце, газам ці электраэнергіяй. Сувязісты збіраюцца пракласці оптавалакно. Інакш кажучы, Хутар атрымлівае прывабнасць з пункту гледжання набыцця жылля нават тымі, хто працуе ў горадзе, як некалі зрабіў выбар ён сам.
Антон Мельнікаў упэўнены, што сацыяльная накіраванасць дзейнасці дзяржавы мае свае перавагі, паколькі прапануе чалавеку, незалежна ад статусу і месца жыхарства, паўнацэнна карыстацца ўсімі выгодамі.
Дзяржава, паводле слоў Антона Мельнікава, выступае партнёрам грамадзяніна ва ўсім: «У нашай краіне прадугледжаны ўсе магчымасці, каб чалавек у поўнай меры раскрыў свой патэнцыял і накіраваў яго на карысць дзяржавы. Гэта ўзаемны працэс, які робіць краіну багацейшай, а чалавека больш паспяховым. І цяпер мала, каб грамадзяне проста выконвалі свае абавязкі. Дзяржава разлічвае не толькі на падтрымку грамадзян, але і на актыўны ўдзел у яе кіраванні. Механізм Усебеларускага народнага сходу ў гэтым выпадку служыць прыкладам такой плённай працы. Самі людзі выступаюць будаўнікамі стратэгіі развіцця краіны, вызначаюць яе прыярытэты і клапоцяцца пра ўсе віды бяспекі. За 30 гадоў незалежнага развіцця наш народ дасягнуў той ступені сталасці, калі кожны чалавек адчувае адказнасць за краіну і свядома ўносіць уклад у яе будаўніцтва, у той жа час атрымліваючы падтрымку дзяржавы ва ўсіх сваіх пачынаннях».
Андрэй Сілівончык. Газета «Светлагорскiя навiны»
