Усебеларускі народны сход – гарант палітычнай стабільнасці і суверэнітэту
Інтэрв'ю, публікацыі, меркаванні
Слова – дэлегатам
Прадстаўляем дэлегатаў Усебеларускага народнага сходу ад Столінскага раёна Брэсцкай вобласці
Аляксандр МІНЧЫК, начальнік Столінскага раённага аддзела па надзвычайных сітуацыях установы «Брэсцкае абласное ўпраўленне Міністэрства па надзвычайных сітуацыях Рэспублікі Беларусь»:
– Я ганаруся, што мне зноў выпала прадстаўляць наш раён у час VII Усебеларускага народнага сходу. Лічу, што гэта вельмі адказная місія, асабліва цяпер, калі УНС набыў новы статус.
З УНС як грамадскай з'явай мы ўжо сутыкаемся не першы раз. Папярэднія з'езды прадэманстравалі сваю важнасць у вырашэнні найбольш актуальных пытанняў для ўсяго нашага грамадства. Да пастаноўкі галоўных для дзяржавы акцэнтаў прыцягваюцца грамадзяне з усёй краіны. І гэта правільна. Меркаванне кожнага трэба пачуць, улічыць, каб канчатковае рашэнне было ўзважаным і непахісным.
Да мерапрыемства такога ўзроўню маральна рыхтуюся ўжо сёння. Лічу, што раён даверыў мне выканаць ганаровую і адказную задачу. Нам, дэлегатам ад Столінскага раёна, давядзецца прадстаўляць інтарэсы сваіх землякоў.
Я прадстаўляю сілавы блок. Калі ўлічыць, што мы жывём у прыгранічным раёне, а час зусім няпросты, то адказнасць падвойваецца. Беларусь – міралюбівая краіна, а мы, беларусы, выступаем за мір і згоду, таму нацэлены на фарміраванне добрасуседскіх узаемаадносін, але пры гэтым будзем вырашаць першарадную задачу па забеспячэнні нацыянальных інтарэсаў на дзяржаўнай граніцы і ў пагранічнай прасторы. Гэта не што іншае, як жыццё ў прыграніччы і спакой землякоў.
Віктар ГАПКО, старшыня Альшанскага сельскага Савета дэпутатаў:
– Наша асноўная мэта – гэта стварэнне ўмоў для камфортнага пражывання жыхароў, новых рабочых месцаў і прыцягненне інвестыцый у развіццё нашай тэрыторыі. Мы заўсёды падтрымліваем ініцыятыву людзей, – дзеліцца Віктар Анатольевіч. – Самым актыўным і прадпрымальным грамадзянам прадастаўляем землі для будаўніцтва цяпліц і агароднінасховішчаў. Па магчымасці прапануем свабодныя або закінутыя ўчасткі для вырошчвання сельгаспрадукцыі. Патрабуецца актыўны ўклад і ў развіццё сацыяльнай сферы. Бо даступная медыцына, адукацыя і аператыўнае абслугоўванне насельніцтва адыгрываюць ключавыя ролі ў камфортным жыцці кожнага. Дзякуючы працавітасці насельніцтва Альшанскі сельскі Савет актыўна развіваецца ў розных напрамках. Моладзь з задавальненнем застаецца і вяртаецца сюды пасля навучання ва ўніверсітэтах краіны. Весці падсобную гаспадарку могуць не ўсе, таму многія праяўляюць сябе як крэатыўныя індывідуальныя прадпрымальнікі: фота- і відэапаслугі, магазіны любога цэнавага дыяпазону і накіраванасці, паслугі кандытараў, повараў, вядучых, аніматараў, упрыгожванне залаў і г.д.
– Што датычыцца дзейнасці Усебеларускага народнага сходу, то адна толькі назва, што гэта вышэйшы орган, ужо сведчыць аб значнасці гэтага мерапрыемства. Калі на твае плечы кладзецца такая адказнасць, адчуваеш гонар, што наш край памятаюць і звяртаюць увагу на мясцовыя праблемы. Я прыйшоў у Альшанскі сельвыканкам у 2006 годзе. Ужо тады і я, і людзі разумелі, што трэба мяняць нашы асновы і лад жыцця. На працягу ўсёй сваёй дзейнасці гэта пачуццё мяне не пакідае да гэтага часу. Таму будзем мяняць нашу мясцовасць да лепшага і далей.
Аксана ВЯРЭНІЧ, загадчык Стахаўскага фельчарска-акушэрскага пункта ўстановы аховы здароўя «Cтолінская цэнтральная раённая бальніца»:
– Вельмі адказна стаць дэлегатам УНС і прадстаўляць інтарэсы землякоў на такім высокім узроўні. Спадзяюся, што змагу апраўдаць ускладзены на мяне давер, унесці свой уклад у развіццё нашай дзяржавы. Як прадстаўнік медыцыны сваю асноўную ролю бачу ў развіцці сферы аховы здароўя. Нядаўна наш Прэзідэнт гаварыў аб тым, што медыцына павінна быць даступнай для кожнага жыхара, уключаючы і сельскую. Падтрымліваю гэта меркаванне. І ўсімі спосабамі стараюся прымаць у гэтым актыўны ўдзел. Дэлегат УНС – несумненна, патрыёт, неабыякавы да праблем роднага краю. Мне хацелася б, каб у нас былі добрыя дарогі, добраўпарадкаваныя населеныя пункты.
