Усебеларускі народны сход – гарант палітычнай стабільнасці і суверэнітэту
Інтэрв'ю, публікацыі, меркаванні
Дзіяна Крэс: Грамадскія фарміраванні трымаюцца на людзях з актыўнай грамадзянскай пазіцыяй
Старшыня Іванаўскай раённай арганізацыі Рэспубліканскага грамадскага аб'яднання «Белая Русь», галоўны рэдактар Іванаўскай раённай газеты «Янаўскі край», дэлегат сёмага Усебеларускага народнага сходу Дзіяна Крэс падзялілася сваёй думкай аб неабходнасці развіцця грамадзянскай супольнасці ў краіне і расказала, як грамадзяне могуць удзельнічаць у грамадскім жыцці раёна, вобласці, рэспублікі.
– Іванаўская раённая арганізацыя РГА «Белая Русь» сёння – гэта 1264 аднадумцы. Больш за 320 жыхароў раёна з'яўляюцца членамі Беларускай партыі «Белая Русь». А дабавім сюды яшчэ членаў Беларускага рэспубліканскага саюза моладзі, Беларускага саюза жанчын і іншых грамадскіх аб'яднанняў і партый, якія дзейнічаюць на тэрыторыі раёна, і атрымаем значную сілу грамадзянскай супольнасці, здольную вырашаць самыя амбіцыйныя задачы.
У 2023 годзе ў Рэспубліцы Беларусь прыняты Закон «Аб асновах грамадзянскай супольнасці», якім вызначаецца само паняцце грамадзянскай супольнасці, устанаўліваюцца прававыя і арганізацыйныя асновы ўзаемадзеяння дзяржаўных органаў і грамадзянскай супольнасці ў мэтах забеспячэння кансалідацыі намаганняў асобы, грамадства і дзяржавы па рэалізацыі нацыянальных інтарэсаў Рэспублікі Беларусь.
Найбольш аўтарытэтныя і прадстаўнічыя суб'екты грамадзянскай супольнасці надзелены правам выбрання дэлегатаў Усебеларускага народнага сходу, праз якіх могуць уносіць прапановы для абмеркавання на гэтым народным форуме і ўдзельнічаць у рэалізацыі яго рашэнняў, а значыць, прымаць непасрэдны ўдзел у выбары курсу развіцця краіны.
Галоўная мэта любога грамадскага аб'яднання – кансалідацыя грамадства для вырашэння вызначаных задач. Удзел у рабоце грамадскіх аб'яднанняў – гэта магчымасць для кожнага рэалізаваць сябе, ажыццявіць свае ідэі. Грамадскія фарміраванні трымаюцца на людзях з актыўнай грамадзянскай пазіцыяй. Вядома, быць ці не быць членам грамадскага аб'яднання або партыі – справа кожнага. Для мяне, напрыклад, заўсёды было важна знаходзіцца ў цэнтры падзей, непасрэдна ўдзельнічаць у грамадскім жыцці, мець дачыненне да пераўтварэнняў і прыняцця рашэнняў, ад якіх залежыць наша жыццё.
Я пераканана, што лёс і развіццё Беларусі залежаць ад голасу кожнага з нас, у тым ліку і майго. І я рада, што ў мяне шмат аднадумцаў. Давайце разам кіраваць сваім жыццём!
