Усебеларускі народны сход Час выбраў нас!

Інтэрв'ю, публікацыі, меркаванні

Дэлегат Вячаслаў Даніловіч: УНС — гэта голас усяго беларускага народа

Намеснік старшыні Пастаяннай камісіі Палаты прадстаўнікоў па адукацыі, культуры і навуцы Вячаслаў Даніловіч падзяліўся сваёй думкай па тэмах, актуальных для яго як палітыка і вучонага, доктара гістарычных навук.

Тысячагадовая гісторыя і наша сучаснасць

— Нягледзячы на тое, што па навуковых мерках наша нацыянальная дзяржава адносна маладая, гісторыя беларускай дзяржаўнасці мае тысячагадовыя карані, — адзначыў В. Даніловіч. — Лагічна, што набыты намі вопыт продкаў у справе пабудовы  ўстойлівай дзяржаўнай сістэмы мы выкарыстоўваем на сучасным этапе. Асабліва ярка гэта бачна, калі звярнуцца да сутнасці Усебеларускага народнага сходу, чые карані ўзыходзяць да старажытнаславянскага веча. УНС паспеў ужо даказаць сваю эфектыўнасць у навейшай гісторыі Беларусі, унёсшы важкі ўклад у забеспячэнне міру і стабільнасці, паступальнае сацыяльна-эканамічнае развіццё беларускай дзяржавы.

Эксперт нагадвае, што ва Усебеларускага народнага сходу  ёсць вельмі шырокія паўнамоцтвы, але ў той жа час на кожнага з дэлегатаў ускладзена велізарная адказнасць перад землякамі-беларусамі.

— Яго рашэнні абавязковыя для выканання дзяржаўнымі органамі і службовымі асобамі. Асаблівы статус УНС забяспечваецца ўдзелам у яго дзейнасці прадстаўнікоў усіх галін улады, органаў мясцовага самакіравання, а таксама грамадзянскай супольнасці. Пры гэтым Усебеларускі народны сход фактычна ўяўляе сабой надбудову над усімі органамі ўлады. Вобразна кажучы, гэта голас усяго беларускага народа.

В. Даніловіч расказаў таксама, чаго ён асабіста чакае ад пасяджэння УНС сёмага склікання ў бягучым годзе:

— Перш за ўсё, як дэпутат і грамадзянін Рэспублікі Беларусь, я ўпэўнены, што дэлегатам удасца ўнесці ўклад у забеспячэнне ўстойлівасці беларускай дзяржавы з улікам таго геапалітычнага шторму, які мы сёння назіраем. Важна падвесці вынікі Праграмы сацыяльна-эканамічнага развіцця краіны на 2021–2025 гады, абмеркаваць і зацвердзіць такую праграму на наступную пяцігодку. Лічу, што ў ёй павінны знайсці адлюстраванне актуальныя напрамкі развіцця сістэм адукацыі, аховы здароўя, тэхналагічнай самадастатковасці, захавання гісторыка-культурнай спадчыны. Не сумняваюся, знойдзецца месца для вырашэння пытанняў экалогіі, забеспячэння новых стандартаў якасці жыцця насельніцтва і гэтак далей. Нарэшце, актуальным можа стаць абмеркаванне і прыняцце Нацыянальнай стратэгіі ўстойлівага развіцця да 2040 года.

Свята  з глыбокім падтэкстам

В. Даніловіч вялікую ўвагу ўдзяліў і тэме будучага Дня народнага адзінства:

— Сёння, ва ўмовах інфармацыйных і гібрыдных войнаў, выключнае значэнне мае кансалідацыя нашага грамадства на аснове духоўна-маральных каштоўнасцей і базавых прынцыпаў ідэалогіі беларускай дзяржавы, — адзначыў ён. — Нашы продкі тысячагоддзямі жылі ў сэрцы Еўропы, на геапалітычным скрыжаванні, праз якое пракаціліся тысячы войнаў і ўзброеных канфліктаў. А цяпер удумайцеся ў гэты факт. Нягледзячы на полымя ваенных узрушэнняў, якое спальвае ўсё на сваім шляху, мы не згінулі з гістарычнай арэны. Уся справа ў тым, што яны былі адзіныя ў сваім імкненні жыць на гэтай зямлі і жыць так, як лічылі патрэбным. Гісторыя бязлітасна вучыла беларусаў: толькі разам, стоячы плячо ў плячо, можна пераадолець любыя беды і трагедыі.

Спікер нагадаў таксама некалькі гістарычных фактаў:

— У 1921 годзе беларусы пазналі трагедыю нацыянальнага раз’яднання, калі Заходняя Беларусь сілай зброі была ўключана ў склад польскай дзяржавы. Аж да восені 1939 года праводзілася мэтанакіраваная палітыка паланізацыі нашага насельніцтва. Аляксандр Мяйштовіч, які займаў пасаду міністра юстыцыі Польшчы з 1926 па 1928 год, адкрыта заяўляў тады: «Беларуская этнаграфічная маса павінна быць перароблена ў польскі народ». Таму падзеі восені 1939 года, калі Заходняя Беларусь уз’ядналася з БССР, трэба лічыць актам гістарычнай справядлівасці ў адносінах да беларускага народа. Скончыліся вельмі цяжкія выпрабаванні, якія выпалі на долю беларусаў у міжваеннай польскай дзяржаве. Спыніліся паланізацыя, нацыянальны, сацыяльны і культурны прыгнёт. Знішчана была дыскрымінацыйная палітыка, якую ажыццяўлялі польскія ўлады ў адносінах да беларусаў, груба парушаючы міжнароднае і нават уласнае заканадаўства.

Таксама В. Даніловіч дадаў:

— У забеспячэнні суверэнітэту і кансалідацыі нацыі  гістарычна важнейшую ролю адыгрывае нацыянальны лідар, здольны весці за сабой народ па шляху стварэння. Дзякуй Богу, у беларусаў такі лідар ёсць. У тым ліку таму Беларусь з годнасцю  вытрымлівае ўдары, якія ёй спрабавалі і спрабуюць нанесці на самых розных узроўнях і напрамках. Нас не зламаць і не ўнізіць. На гэта нацыю і дзяржаву нацэльваюць у тым ліку і Дзень народнага адзінства, і чарговае пасяджэнне УНС.

Паводле матэрыялаў агенцтва «Мінск-Навіны».