Усебеларускі народны сход – гарант палітычнай стабільнасці і суверэнітэту
Інтэрв'ю, публікацыі, меркаванні
Ала Смаляк «Дэмаграфічная бяспека – ключавы складнік нацыянальнай бяспекі»
На гэтым зрабіла акцэнт член Пастаяннай камісіі Савета Рэспублікі Нацыянальнага сходу Рэспублікі Беларусь па міжнародных справах і нацыянальнай бяспецы, старшыня Гомельскай абласной арганізацыі рэспубліканскага грамадскага аб'яднання «Беларускае Таварыства Чырвонага Крыжа», дэлегат сёмага Усебеларускага народнага сходу Ала Смаляк у час сустрэчы 22 жніўня 2025 г. у камітэце па працы, занятасці і сацыяльнай абароне Гомельскага аблвыканкама.
«У нашай краіне пытанне дэмаграфіі ў пастаянным фокусе ўвагі, бо гэта аснова развіцця дзяржавы. Важнасць дэмаграфічнай бяспекі падкрэслена ў абноўленай Канцэпцыі нацыянальнай бяспекі Рэспублікі Беларусь. Так, у ліку асноўных нацыянальных інтарэсаў у дэмаграфічнай сферы названы стабілізацыя колькасці насельніцтва і стварэнне перадумоў для яго ўстойлівага росту на аснове паслядоўнага павелічэння нараджальнасці і чаканай працягласці жыцця, зніжэння смяротнасці, павышэнне агульнага ўзроўню здароўя насельніцтва, ахова здароўя маці і дзіцяці, умацаванне інстытута сям'і як сацыяльнага інстытута, найбольш спрыяльнага для рэалізацыі патрэбнасці ў дзецях, іх выхавання, развіццё сістэмы падтрымкі сем'яў з дзецьмі і паляпшэнне ўмоў іх жыццядзейнасці», – падкрэсліла Ала Смаляк.
На сустрэчы таксама абмяркоўваліся аспекты фарміравання дзяржаўнай праграмы «Здароўе народа і дэмаграфічная бяспека» на наступную пяцігодку, размова ішла аб навучанні парадзіх, маці маленькіх дзяцей асновам аказання першай дапамогі. «Гэта праграма пры рэалізацыі дазволіць уберагчы дзяцей ад розных экстранных сітуацый, уберагчы іх жыццё і здароўе», – адзначыла член Савета Рэспублікі.
Парламентарый звярнула ўвагу на тое, што ў Беларусі распрацаваны і рэалізуецца маштабны, шмат у чым унікальны комплекс мер па дзяржпадтрымцы, абароне мацярынства, дзяцінства, бацькоўства. «Гэта і дастойная матэрыяльная падтрымка сем'яў пры нараджэнні і выхаванні дзяцей. З 2015 года ў нашай краіне рэалізуецца праграма сямейнага капіталу пры нараджэнні трэцяга або наступнага дзіцяці. Дзяржава аказвае дапамогу і ў вырашэнні жыллёвых пытанняў маладым, шматдзетным сем'ям. Прадугледжаны працоўныя гарантыі для працуючых бацькоў», – канкрэтызавала член Савета Рэспублікі.
Яна дадала: многае робіцца для ўмацавання статусу сям'і, захавання і папулярызацыі традыцыйных сямейных каштоўнасцей, якія з'яўляюцца важнай умовай дэмаграфічнай бяспекі, упэўненага развіцця беларускага грамадства.
Непасрэдна з дэмаграфічнай бяспекай звязана і развіццё сістэмы аховы здароўя, адзначыла Ала Смаляк. «Як падкрэсліваў наш Прэзідэнт Аляксандр Рыгоравіч Лукашэнка: «Здароўе любой нацыі – гэта залог яе ўстойлівага развіцця і працвітання». І ўвага беларускай дзяржавы да пытанняў медыцыны, аховы здароўя заўсёды самая пільная. Кожны грамадзянін нашай краіны незалежна ад сацыяльнага становішча бясплатна атрымлівае медыцынскую дапамогу. А высокая якасць беларускай медыцыны, укараненне самых сучасных, інавацыйных тэхналогій лячэння сталі нашай візітнай карткай далёка за межамі краіны», – сказала на заканчэнне дэлегат сёмага Усебеларускага народнага сходу.
