Усебеларускі народны сход – гарант палітычнай стабільнасці і суверэнітэту

Галоўная / АБ УНС / Парадак фарміравання УНС

Парадак фарміравання УНС

Парадак фарміравання і тэрмін паўнамоцтваў
Усебеларускага народнага сходу

Усебеларускі народны сход (УНС) фарміруецца з дэлегатаў, якія прадстаўляюць розныя сацыяльныя слаі і групы грамадства.

Дэлегатамі УНС з’яўляюцца:
– Прэзідэнт Рэспублікі Беларусь;
– Прэзідэнт Рэспублікі Беларусь, які спыніў выкананне сваіх паўнамоцтваў у сувязі з завяршэннем тэрміну яго знаходжання на пасадзе альбо датэрмінова ў выпадку яго адстаўкі;
– прадстаўнікі заканадаўчай, выканаўчай і судовай улады;
– прадстаўнікі мясцовых Саветаў дэпутатаў;
– прадстаўнікі грамадзянскай супольнасці.

Гранічная колькасць дэлегатаў УНС складае 1200 чалавек.

Прадстаўнікі ад заканадаўчай, выканаўчай і судовай улады, а таксама дэпутаты Мінскага гарадскога Савета дэпутатаў з'яўляюцца дэлегатамі УНС па пасадзе, а прадстаўнікі ад іншых мясцовых Саветаў дэпутатаў, а таксама ад грамадзянскай супольнасці выбіраюцца ў парадку, устаноўленым законам.

Дэлегатамі УНС ад заканадаўчай улады з’яўляюцца дэпутаты Палаты прадстаўнікоў і члены Савета Рэспублікі Нацыянальнага сходу Рэспублікі Беларусь.

Дэлегатамі УНС ад выканаўчай улады з’яўляюцца:
– Прэм'ер-міністр Рэспублікі Беларусь, яго намеснікі і іншыя члены Савета Міністраў Рэспублікі Беларусь;
– старшыні абласных, Мінскага гарадскога выканаўчых камітэтаў;
– старшыні раённых, гарадскіх (гарадоў абласнога падпарадкавання) выканаўчых камітэтаў.

Дэлегатамі УНС ад судовай улады з’яўляюцца:
– Старшыня, намеснік Старшыні і суддзі Канстытуцыйнага Суда Рэспублікі Беларусь;
– Старшыня, намеснікі Старшыні і суддзі Вярхоўнага Суда Рэспублікі Беларусь.

Дэлегатамі УНС ад мясцовых Саветаў дэпутатаў з’яўляюцца:
– прадстаўнікі мясцовых Саветаў дэпутатаў ад кожнай вобласці, якія выбіраюцца абласнымі Саветамі дэпутатаў з ліку дэпутатаў мясцовых Саветаў дэпутатаў абласнога, базавага і першаснага тэрытарыяльных узроўняў у парадку, устаноўленым рэгламентамі мясцовых Саветаў дэпутатаў, з улікам патрабаванняў Закона Рэспублікі Беларусь ад 7 лютага 2023 г. № 248-З «Аб Усебеларускім народным сходзе», Выбарчага кодэкса Рэспублікі Беларусь і іншых законаў. Нормы прадстаўніцтва мясцовых Саветаў дэпутатаў ад кожнай вобласці вызначаюцца Цэнтральнай выбарчай камісіяй прапарцыянальна колькасці выбаршчыкаў, якія пражываюць на тэрыторыі адпаведнай вобласці;
– дэпутаты Мінскага гарадскога Савета дэпутатаў.

Гранічная колькасць дэлегатаў УНС ад мясцовых Саветаў дэпутатаў складае 350 чалавек.

Нормы прадстаўніцтва дэлегатаў УНС ад мясцовых Саветаў дэпутатаў (за выключэннем Мінскага гарадскога Савета дэпутатаў, усе дэпутаты якога з'яўляюцца дэлегатамі УНС) вызначаны пастановай Цэнтральнай выбарчай камісіі Рэспублікі Беларусь ад 1 сакавіка 2024 г. № 19 і склалі:
ад Брэсцкай вобласці – 52 дэлегаты;
ад Віцебскай вобласці – 44 дэлегаты;
ад Гомельскай вобласці – 55 дэлегатаў;
ад Гродзенскай вобласці – 38 дэлегатаў;
ад Мінскай вобласці – 60 дэлегатаў;
ад Магілёўскай вобласці – 41 дэлегат.

Дэлегатамі УНС ад грамадзянскай супольнасці з’яўляюцца прадстаўнікі суб'ектаў грамадзянскай супольнасці, якія ўдзельнічаюць у выбарах дэлегатаў УНС.

Умовы і парадак удзелу суб'ектаў грамадзянскай супольнасці ў выбарах дэлегатаў УНС вызначаюцца Законам Рэспублікі Беларусь «Аб Усебеларускім народным сходзе», Выбарчым кодэксам Рэспублікі Беларусь, Законам Рэспублікі Беларусь ад 14 лютага 2023 г. № 250-З «Аб асновах грамадзянскай супольнасці» і іншымі законамі.

Гранічная колькасць дэлегатаў УНС ад грамадзянскай супольнасці складае 400 чалавек.

Ад кожнага суб'екта грамадзянскай супольнасці, які ўдзельнічае ў выбарах дэлегатаў УНС, выбіраецца роўная колькасць дэлегатаў, вызначаемая Цэнтральнай выбарчай камісіяй зыходзячы з колькасці суб'ектаў грамадзянскай супольнасці, што ўдзельнічаюць у выбарах дэлегатаў УНС, і ўстаноўленай гранічнай колькасці дэлегатаў УНС ад грамадзянскай супольнасці. Пры гэтым забяспечваецца прадстаўніцтва ад кожнай вобласці і горада Мінска.

Міністэрствам юстыцыі да суб'ектаў грамадзянскай супольнасці, якія маюць права выбіраць дэлегатаў УНС, аднесены:
– Рэспубліканскае грамадскае аб'яднанне «Белая Русь»;
– Беларускае грамадскае аб'яднанне ветэранаў;
– Грамадскае аб’яднанне «Беларускі саюз жанчын»;
– Грамадскае аб’яднанне «Беларускі рэспубліканскі саюз моладзі»;
– Федэрацыя прафсаюзаў Беларусі.
Пастановай Цэнтральнай выбарчай камісіі Рэспублікі Беларусь ад 1 сакавіка 2024 г. № 20 «Аб нормах прадстаўніцтва дэлегатаў Усебеларускага народнага сходу ад грамадзянскай супольнасці», прынятай у адпаведнасці з Выбарчым кодэксам Рэспублікі Беларусь, зыходзячы з гранічнай колькасці дэлегатаў УНС ад грамадзянскай супольнасці ў колькасці 400 чалавек вызначана норма прадстаўніцтва дэлегатаў ад кожнага суб'екта грамадзянскай супольнасці ў колькасці 80 дэлегатаў.

Дэлегаты УНС ад грамадзянскай супольнасці выбіраюцца вышэйшымі органамі суб'ектаў грамадзянскай супольнасці з ліку членаў гэтых суб'ектаў (членаў арганізацый, якія ўваходзяць у склад суб'екта грамадзянскай супольнасці). Парадак вылучэння і выбрання дэлегатаў УНС ад грамадзянскай супольнасці вызначаецца статутамі суб'ектаў грамадзянскай супольнасці з улікам патрабаванняў Закона Рэспублікі Беларусь «Аб Усебеларускім народным сходзе», Выбарчага кодэкса Рэспублікі Беларусь і іншых законаў.

Суб’екты грамадзянскай супольнасці вылучылі кандыдатаў у дэлегаты УНС у ходзе пасяджэнняў сваіх абласных і Мінскай гарадской арганізацыйных структур у перыяд з 12 па 31 сакавіка 2024 г. Выбранне дэлегатаў УНС адбылося на пасяджэннях вышэйшых органаў суб’ектаў грамадзянскай супольнасці ў перыяд з 1 па 10 красавіка 2024 г.

Тэрмін паўнамоцтваў Усебеларускага народнага сходу складае пяць гадоў. Паўнамоцтвы УНС чарговага склікання пачынаюцца з дня яго першага пасяджэння і заканчваюцца ў дзень адкрыцця першага пасяджэння УНС новага склікання.