Усебеларускі народны сход Час выбраў нас!

Падзеі

Вадзім Богуш: Усебеларускі народны сход - вышэйшы орган стратэгічнага развіцця краіны

2 ліпеня 2025 г. у актавай зале адміністрацыі Савецкага раёна г.Мінска адбылася дыялогавая пляцоўка з работнікамі арганізацый раёна па абмеркаванні актуальных задач, якія стаяць перад дэлегатамі сёмага Усебеларускага народнага сходу. Спікерам выступіў дэлегат Усебеларускага народнага сходу, член яго Прэзідыума, старшыня Савета рэктараў вышэйшых навучальных устаноў Рэспублікі Беларусь, рэктар Беларускага дзяржаўнага ўніверсітэта інфарматыкі і радыёэлектронікі Вадзім Богуш, а мадэратарам - дэлегат Усебеларускага народнага сходу, кіраўнік адміністрацыі Савецкага раёна г.Мінска Аляксандр Шчаковіч.

На сустрэчы былі закрануты тэмы структуры і прынцыпаў дзейнасці Усебеларускага народнага сходу, яго паўнамоцтваў, арганізацыі работы дэлегатаў УНС.

Як адзначыў спікер, у адпаведнасці з палажэннямі Канстытуцыі Беларусі першае пасяджэнне УНС адбылося на працягу 60 дзён пасля выбараў дэпутатаў у адзіны дзень галасавання. На пасяджэнні Сходу былі выбраны яго кіруючыя органы і вызначана колькасць Прэзідыума - 15 чалавек. Так, тайным галасаваннем выбіраліся Старшыня, Намеснік Старшыні УНС і іншыя члены Прэзідыума. Старшынёй быў выбраны Прэзідэнт нашай краіны Аляксандр Лукашэнка.

Пад яго кіраўніцтвам на першых пасяджэннях Прэзідыума быў прыняты шэраг рашэнняў, у тым ліку па арганізацыйнай структуры Усебеларускага народнага сходу. Апошняя прадугледжвае, што Старшыня УНС узаемадзейнічае з дэлегацыямі, сфарміраванымі па прынцыпе прыналежнасці да той ці іншай галіны ўлады і тэрыторыі, як непасрэдна, так і праз Намесніка Старшыні, Прэзідыум і Сакратарыят УНС.

«Усебеларускі народны сход не з'яўляецца органам, які некага падмяняе. УНС убудоўваецца ў сістэму палітычнага кіравання і стратэгічнага планавання як орган, які забяспечвае рэалізацыю прынцыпу народаўладдзя ў краіне і адказвае за стратэгічнае развіццё дзяржавы. Пры гэтым Канстытуцыя вызначае паўнамоцтвы Усебеларускага народнага сходу, і да гэтых паўнамоцтваў, калі гаварыць узбуйнена, належыць прыняцце важных дакументаў стратэгічнага і праграмнага характару і іншых найбольш значных для жыцця краіны рашэнняў. Акрамя таго, Усебеларускі народны сход прымае кадравыя рашэнні па судзейскім корпусе, па Цэнтральнай выбарчай камісіі, мае права адмены прававых актаў, якія супярэчаць інтарэсам нацыянальнай бяспекі», - растлумачыў прысутным Вадзім Анатольевіч.

Асаблівую ўвагу ў сваім выступленні Вадзім Богуш удзяліў напружанай рабоце ўсіх арганізацый для забеспячэння сацыяльна-эканамічнага развіцця краіны на працягу пяцігодкі 2021-2025 гг., адзначыў крытычныя моманты выканання пастаўленых задач і шляхі ўдасканалення прынцыпаў іх рэалізацыі. Член Прэзідыума УНС указаў на рост грашовых даходаў насельніцтва, зніжэнне ўзроўню беспрацоўя, паспяховае выкананне абавязацельстваў па будаўніцтве жылля. Таксама спікер звярнуў увагу на неабходнасць якаснага доўгатэрміновага планавання і выпрацоўкі стратэгіі развіцця асобных прадпрыемстваў, рэгіёнаў і краіны ў цэлым на доўгатэрміновы перыяд. Выступовец звярнуўся да прысутных з просьбай правесці абмеркаванне гэтых пытанняў у працоўных калектывах.

У рамках дыскусіі была закранута тэма ўплыву штучнага інтэлекту на традыцыйныя сферы жыцця грамадства і бяспеку, узнікаючыя для грамадства рызыкі ў сувязі з магчымым выкарыстаннем штучнага інтэлекту для ажыццяўлення проціпраўных дзеянняў. Адзначана, што тэматыка штучнага інтэлекту адлюстравана ў абноўленай Канцэпцыі нацыянальнай бяспекі, зацверджанай УНС у ходзе свайго першага пасяджэння, і патрабуюцца сумесныя намаганні ўсіх галін улады і грамадства па развіцці і выкарыстанні сучасных тэхналогій у стваральных мэтах.