Усебеларускі народны сход – гарант палітычнай стабільнасці і суверэнітэту
Падзеі
У Гродзенскім універсітэце абмеркавалі рэалізацыю Праграмы сацыяльна-эканамічнага развіцця краіны на 2021–2025 гады
9 ліпеня ў Гродзенскім дзяржаўным універсітэце адбылася сустрэча дэлегата сёмага Усебеларускага народнага сходу, рэктара ўніверсітэта Ірыны Кітурка з працоўным калектывам на тэму «Аб рэалізацыі Праграмы сацыяльна-эканамічнага развіцця Рэспублікі Беларусь на 2021–2025 гады»
– 2025 год яшчэ не завершаны, а гэта значыць, што ў нас з вамі наперадзе яшчэ шмат работы на карысць развіцця нашага грамадства і дзяржавы, бо рэалізацыя Праграмы сацыяльна-эканамічнага развіцця залежыць у тым ліку і ад нас, – адзначыла Ірына Фёдараўна.
Спікер нагадала, што стратэгічныя напрамкі развіцця грамадства і дзяржавы задае Усебеларускі народны сход, у прыватнасці, ён вызначае асноўныя напрамкі ўнутранай і знешняй палітыкі, зацвярджае Канцэпцыю нацыянальнай бяспекі, Ваенную дактрыну і Праграму сацыяльна-эканамічнага развіцця краіны на пяцігодку. Акрамя таго, УНС забяспечвае непахіснасць канстытуцыйнага ладу, пераемнасць пакаленняў і грамадзянскую згоду.
Гаворачы аб дзейнасці і структуры УНС, Ірына Кітурка адзначыла, што функцыянуе афіцыйны сайт гэтага вышэйшага прадстаўнічага органа народаўладдзя краіны, дзякуючы якому можна азнаёміцца з яго дзейнасцю.
Што датычыцца Праграмы сацыяльна-эканамічнага развіцця Рэспублікі Беларусь, то рэктар звярнула ўвагу на яе галоўную мэту.
– Галоўная мэта Праграмы сацыяльна-эканамічнага развіцця краіны – забеспячэнне грамадскай стабільнасці за кошт мадэрнізацыі эканомікі, нарошчвання сацыяльнага капіталу і стварэння камфортных умоў для жыцця, работы і самарэалізацыі чалавека.
Ірына Кітурка дэталёва спынілася на прыярытэтных напрамках развіцця дзяржавы, сярод якіх – шчаслівая сям'я, моцныя рэгіёны, рост інтэлектуальнага патэнцыялу краіны, умацаванне дыялогу паміж дзяржавай і грамадствам, дзяржавай і чалавекам, дзяржавай і бізнесам.
У ходзе свайго выступлення рэктар азнаёміла калектыў са статыстычнымі данымі, звярнуўшы ўвагу на рост паказчыкаў заработнай платы, інвестыцый у асноўны капітал, экспарту тавараў і паслуг, уводу ў эксплуатацыю жылля; расказала аб дэмаграфічнай сітуацыі, занятасці насельніцтва і беспрацоўі, аб зніжэнні паказчыкаў заключэння шлюбаў і павелічэнні колькасці разводаў. Больш падрабязна спынілася на развіцці сферы адукацыі, адзначыўшы месца і ролю Купалаўскага ўніверсітэта ў сістэме вышэйшай адукацыі краіны і падкрэсліўшы перавагу маладых спецыялістаў, выпускнікоў ВНУ нашай краіны, якія навучаюцца не толькі за кошт сродкаў бюджэту, але і на платнай аснове, і могуць атрымаць гарантаванае першае рабочае месца.
Ірына Кітурка акцэнтавала ўвагу і на асноўных паказчыках дзейнасці арганізацый, якія выконвалі навуковыя даследаванні. Прывяла паказчыкі развіцця сферы культуры і спорту нашай краіны, адзначыўшы павышэнне якасці фізкультурна-аздараўленчых і турыстычных паслуг.
У канцы свайго выступлення яна назвала шэраг задач, якія стаяць сёння перад грамадствам для далейшага сацыяльна-эканамічнага развіцця краіны. Гэта нарошчванне тэмпаў інвестыцыйнай дзейнасці, развіццё высокатэхналагічных вытворчасцей, навукаёмістасць ВУП, паскоранае развіццё рэгіёнаў, дэмаграфічная бяспека і дыверсіфікацыя экспарту.
