Усебеларускі народны сход – гарант палітычнай стабільнасці і суверэнітэту

Галоўная / Медыя / Падзеі
Падзеі

Цыкл сустрэч дэлегатаў УНС з працоўнымі калектывамі праходзіць на Лідчыне

15.07.2025
Цыкл сустрэч дэлегатаў УНС з працоўнымі калектывамі праходзіць на Лідчыне

На Лідчыне праходзіць цыкл сустрэч дэлегатаў сёмага Усебеларускага народнага сходу з працоўнымі калектывамі. Адна з іх адбылася гэтымі днямі ў філіяле «Лідскі хлебазавод» ААТ «Гроднахлебпрам». Прадстаўнікі дэлегацыі ад Лідчыны – старшыня Лідскага раённага Савета дэпутатаў Інеса Белуш, старшыня Бярозаўскага гарвыканкама, дэпутат Гродзенскага абласнога Савета дэпутатаў Валерый Яводзік і дырэктар ДРБУ №157, дэпутат Траццякоўскага сельскага Савета дэпутатаў Антон Сокал – абмеркавалі з работнікамі філіяла ключавыя пытанні сацыяльна-эканамічнага развіцця краіны і раёна.

Цэнтральнымі ж тэмамі сталі работа сёмага Усебеларускага народнага сходу, а таксама прапановы па перспектыўных напрамках развіцця дзяржавы і грамадства для ўнясення ў Праграму сацыяльна-эканамічнага развіцця краіны на будучую пяцігодку.

– У цэнтры ўвагі сёмага Усебеларускага народнага сходу былі пытанні, якія на сённяшні дзень з'яўляюцца вельмі актуальнымі і важнымі для любой краіны, – адзначыла Інеса Белуш. – Прэзідэнт актыўна спрабуе данесці да грамадства тую няпростую сітуацыю, якая складваецца ў свеце. І тое, што мы 81 год пражылі ў мірных умовах, шмат у чым дзякуючы палітыцы, якая праводзілася Кіраўніком нашай дзяржавы. Самае важнае, што нам варта зразумець і прыняць: нельга заваяваць і перамагчы краіну, дзе існуе адзінства людзей, дзе моцны дух патрыятызму ў народа.

Сустрэча дэлегатаў УНС з працоўным калектывам прадыктавана часам. Згодна з Канстытуцыяй краіны паўнамоцтва зацвярджаць Праграму сацыяльна-эканамічнага развіцця на пяцігодку прадастаўлена менавіта Усебеларускаму народнаму сходу. Цяпер задача дэлегатаў – пачуць меркаванні, прапановы людзей па развіцці краіны на перспектыву.

– Мы будзем рады пачуць ад вас прапановы, каб новая праграма, сапраўды, адпавядала нашым агульным запатрабаванням, – адзначыла Інеса Белуш.

У рамках дыялогу ўдзельнікі сустрэчы абмеркавалі пазіцыю Беларусі на міжнароднай арэне. Асаблівую ўвагу ўдзялілі сацыяльна-эканамічнаму развіццю краіны ў цэлым і рэгіёна ў прыватнасці. Дзякуючы складу дэлегатаў (а ў ім прадстаўнікі розных сфер) закранулі самыя актуальныя для людзей тэмы. Адной з такіх, як правіла, з'яўляюцца дарогі…

Так, Антон Сокал падрабязна спыніўся на сітуацыі з рамонтам дарог у вобласці і раёне.

– Транспартная даступнасць тэрыторый з'яўляецца важным складнікам камфортнага асяроддзя пражывання, таму пры складанні праграмы краіны на пяцігодку таксама фарміруецца і Дзяржаўная праграма «Дарогі Беларусі», – адзначыў выступоўца. – Па Лідскім раёне за 2021–2024 гады мы правялі капітальныя і бягучыя рамонты на 75,5 км дарог. На сённяшні дзень Дзяржпраграма на новую пяцігодку ў стадыі распрацоўкі. У ёй плануецца замацаваць крытэрыі, якія вызначаюць неабходнасць удасканаленага дарожнага пакрыцця на аўтадарогах. Запланаваны рамонт дарог, стаянак, іншай інфраструктуры паблізу турыстычных аб'ектаў, санаторна-курортных і аздараўленчых арганізацый. У рамках Года добраўпарадкавання рэалізуецца шэраг мерапрыемстваў, накіраваных на стварэнне і падтрыманне зручнага і бяспечнага асяроддзя жыццядзейнасці людзей.

Старшыня Бярозаўскага гарвыканкама Валерый Яводзік расказаў пра вопыт рэалізацыі грамадзянскіх ініцыятыў у горадзе над Нёманам:

– За мінулы год іх рэалізавана ўжо дзве. Абедзве звязаны з уладкаваннем зон адпачынку вакол возера і развіццём спартыўнай інфраструктуры. У абедзвюх ініцыятарамі выступалі самі жыхары. Важная ўмова – суфінансаванне, гэта значыць, частка сродкаў выдзялялася з абласнога бюджэту (90%), а частку (10%) сабралі людзі. У бягучым годзе мы зноў сталі пераможцамі конкурсу грамадзянскіх ініцыятыў, які праводзіцца Гродзенскай асацыяцыяй мясцовых Саветаў дэпутатаў. Такім чынам, на адной з гарадскіх дваровых тэрыторый хутка з'явіцца яшчэ адзін спартыўны аб'ект.

Сустрэча прайшла ў цёплай і давернай атмасферы: работнікі прадпрыемства актыўна задавалі хвалюючыя пытанні і выказвалі меркаванні. Для дэлегатаў УНС важнай была зваротная сувязь з людзьмі.

Пасля заканчэння сустрэчы дэлегаты азнаёміліся з прадпрыемствам. Лідскі хлебазавод дынамічна развіваецца і пастаянна прыслухоўваецца да запытаў пакупнікоў. Як вынік – радуе іх смачнай прадукцыяй, у тым ліку навінкамі. Нядаўна, напрыклад, асвоены і ўжо выпушчаны ў продаж шэраг новых відаў хлеба і кандытарскіх вырабаў.

Паводле матэрыялаў «Лiдскай газеты»

https://lidanews.by/news/vlast/42534news.html