Усебеларускі народны сход – гарант палітычнай стабільнасці і суверэнітэту
Падзеі
Сергяенка: калі б не было падзей 17 верасня 1939 г., Беларусь заставалася б разарванай, сем'і – раздзеленымі
Аб гэтым заявіў дэлегат сёмага Усебеларускага народнага сходу Старшыня Палаты прадстаўнікоў Нацыянальнага сходу Рэспублікі Беларусь Ігар Сергяенка на ўрачыстым сходзе 12 верасня да Дня народнага адзінства, які прайшоў у Авальнай зале.
«Калі б не было гэтых падзей, калі б не было волі, праяўленай кожным з іх удзельнікаў, Беларусь і дагэтуль заставалася б разарванай, сем'і – раздзеленымі, а беларусы – забыўшымі мову, веру і традыцыі», – сказаў Ігар Сергяенка.
Старшыня Палаты прадстаўнікоў нагадаў, што 86 гадоў таму быў ажыццёўлены акт найвялікшай гістарычнай справядлівасці. Менавіта тут, у Авальнай зале, 14 лістапада 1939 г. на пазачарговай сесіі Вярхоўнага Савета БССР першага склікання быў прыняты закон аб прыняцці Заходняй Беларусі ў склад Беларускай Савецкай Сацыялістычнай Рэспублікі.
Аднаўленне народнага адзінства стала важнейшай вяхой на шляху далейшага нацыянальна-дзяржаўнага развіцця, падкрэсліў Ігар Сергяенка, дадаўшы, што да гэтага былі гады самаадданага супраціўлення паліцэйскаму тэрору, палітыцы паланізацыі беларускага народа, праводзімай уладамі буржуазнай Польшчы.
«І мы бачым, што сёння адбываецца на нашых граніцах, як паводзіць сябе сучасная Польшча ў адносінах да нашай краіны. Не пабаюся гэтага сказаць, але самым дружалюбным перыядам у нашых адносінах з боку нашых суседзяў быў савецкі перыяд», – сказаў Старшыня Палаты прадстаўнікоў.
Барацьба за нацыянальную годнасць, паводле яго слоў, знаходзіла гарачы водгук у сэрцах шырокіх народных мас. І калі пасля вызвалення ў Заходняй Беларусі пачаўся працэс фарміравання органаў мясцовага самакіравання, усюды назіралася высокая грамадская актыўнасць.
«Тыя, хто прыняў лёсавызначальнае рашэнне ў 1939 годзе, а затым грудзьмі абараніў свой выбар у гады Вялікай Айчыннай вайны і адрадзіў краіну з руін, былі самыя звычайныя людзі, такія ж, як і мы з вамі, – сяляне, рабочыя, студэнты, жанчыны і мужчыны, пажылыя і маладыя», – сказаў Ігар Сергяенка, адзначыўшы, што гэта важны для ўсіх урок, бо ніхто не мае права аддзяляць сябе ад гістарычнага працэсу.
«Сумеснымі намаганнямі, кожны на сваім месцы, памятаючы пра абавязак перад Радзімай, мы пішам сучасную старонку гісторыі суверэннай Беларусі і закладваем тым самым асновы нашай будучыні», – падкрэсліў ён.
Ігар Сергяенка працытаваў словы Прэзідэнта Аляксандра Лукашэнкі аб тым, што варта ведаць, у тым ліку дзецям, калі і як перакройваліся граніцы Беларусі, каб дагадзіць чужым нацыянальным інтарэсам, і як гэта – жыць на роднай зямлі, але ў чужой дзяржаве.
У сувязі з гэтым Ігар Сергяенка звярнуў увагу на тое, што ў гэтай зале прысутнічаюць учарашнія школьнікі, а цяпер студэнты, якія паказалі бліскучыя рэзультаты па выніках уступнай кампаніі 2025 года. Такі фармат не выпадковы, ён адлюстроўвае сувязь часоў. «Калі парламентарыі – ужо вядомыя людзі, нашы юныя калегі пад кіраўніцтвам сваіх настаўнікаў пачынаюць спасцігаць дэпутацкую навуку на практыцы, то менавіта цяперашнім першакурснікам трэба будзе падхапіць гэту эстафету пакаленняў», – растлумачыў ён.
Звяртаючыся да маладых людзей, Старшыня Палаты прадстаўнікоў заклікаў, як бы ні склаўся іх лёс, не забываць пра зямлю, якая выгадавала, пра сваіх бацькоў.
Ён выказаў перакананасць, што ўсіх удзельнікаў сённяшняй сустрэчы аб'ядноўвае пачуццё патрыятызму. І падкрэсліў: сёння як ніколі патрэбны дзейны патрыятызм і актыўная асабістая грамадзянская пазіцыя. Менавіта на гэтым засяроджваў увагу Кіраўнік дзяржавы, калі гаварыў, што патрыятызму нельга навучыць, можна толькі паказаць прыклад сваёй шчырай любоўю да роднай зямлі.
Старшыня Палаты прадстаўнікоў таксама адзначыў, што галоўныя героі сённяшняй урачыстасці – людзі, для якіх абарона гістарычнай праўды і кансалідацыя грамадства вакол сапраўдных каштоўнасцей – не проста работа, а сэнс жыцця. Гэтыя людзі сціплыя, не з'яўляюцца медыйнымі персонамі, не рэкламуюць свае дасягненні, а будзённа дзень пры дні праводзяць пошукавыя мерапрыемствы і аўтапрабегі, адкрываюць і захоўваюць помнікі, мемарыяльныя знакі, устанаўліваюць імёны загінулых у гады Вялікай Айчыннай вайны – адным словам, уносяць вялікі асабісты ўклад, у тым ліку ўласныя сродкі, у патрыятычнае выхаванне моладзі і грамадства ў цэлым.
Гаворачы пра будучае свята – Дзень народнага адзінства, Ігар Сергяенка адзначыў, што ў гэтыя дні беларусы аддаюць даніну гістарычнаму мінуламу, ушаноўваюць памяць гераічных продкаў, дзякуючы якім жывуць на сваёй зямлі, у сваёй дзяржаве і захоўваюць суверэннае права самастойна распараджацца сваім лёсам.
«У той жа час задаёмся пытаннем, якім будзе заўтра нашай краіны? Адказ просты – яно будзе такім, якім зробім яго мы з вамі, пакаленне беларусаў, якое цяпер жыве. І ніяк інакш», – падкрэсліў Старшыня Палаты прадстаўнікоў.
Перад пачаткам мерапрыемства яго ўдзельнікі, а гэта прадстаўнікі грамадзянскай супольнасці ад абласцей і г.Мінска, члены Маладзёжнага савета пры Палаце прадстаўнікоў і выпускнікі школ, якія паказалі высокія рэзультаты па выніках уступнай кампаніі 2025 года, у фае Авальнай залы азнаёміліся з экспазіцыяй выстаўкі «Беларусь адзіная. Да гісторыі свята», прымеркаванай да Дня народнага адзінства. Яна прысвечана гістарычнаму лёсу беларускага народа, яго шляху да нацыянальна-дзяржаўнага самавызначэння і ключавой падзеі ў гісторыі краіны – аб'яднання Заходняй Беларусі і БССР у 1939 годзе. Прадстаўлены кніжна-дакументальныя, ілюстрацыйныя экспанаты, якія раскрываюць сэнс і значэнне свята, што сімвалізуе адзінства народа Беларусі ў імкненні да міру і незалежнасці.
Паводле матэрыялаў БЕЛТА.
