Усебеларускі народны сход – гарант палітычнай стабільнасці і суверэнітэту
Падзеі
Разам будуем Беларусь будучыні
У ААТ «Нафтан» адбыўся шэраг мерапрыемстваў з удзелам дэлегата Усебеларускага народнага сходу начальніка комплексу запаволенага каксавання Васіля Жыжова.
У ходзе выступленняў на сустрэчах з працоўным калектывам ААТ «Нафтан» дэлегат акцэнтаваў увагу на тым, што беларуская дзяржава грунтуецца на прынцыпах народаўладдзя, гуманізму, сацыяльнай справядлівасці, роўнасці правоў і магчымасцей, гістарычнай пераемнасці. Таму наша ўлада жыве рэальнымі клопатамі людзей, а не асабістымі эканамічнымі інтарэсамі і амбіцыямі палітыкаў. На сучасным этапе адным з важных фактараў поспеху беларускай мадэлі і адным з гарантаў яе далейшага развіцця, падкрэсліў Васіль Жыжоў, стаў Усебеларускі народны сход.
Ён таксама нагадаў завадчанам статус і асноўныя функцыі УНС і дэлегата Сходу, прынцыпы работы вышэйшага прадстаўнічага органа народаўладдзя ў рэспубліцы, расказаў аб асноўных выніках першага пасяджэння УНС, праведзенага ў 2024 годзе, у тым ліку аб ключавых рашэннях – зацвярджэнні Ваеннай дактрыны і Канцэпцыі нацыянальнай бяспекі Беларусі.
– Цяпер ідзе актыўная падрыхтоўка да другога пасяджэння УНС, – адзначыў дэлегат. – На гэтым этапе падрыхтаваны не менш важныя дакументы: Канцэпцыя Праграмы сацыяльна-эканамічнага развіцця Рэспублікі Беларусь на 2026-2030 гады і Нацыянальная стратэгія ўстойлівага развіцця Рэспублікі Беларусь на перыяд да 2040 года.
Мэта гэтых дакументаў, падкрэсліў Васіль Жыжоў, – забяспечыць высокую якасць жыцця насельніцтва і павышэнне дабрабыту грамадзян на аснове паступальна збалансаванага росту эканомікі, мабілізацыі ўсіх інстытутаў дзяржаўнага кіравання і грамадства. Напрыклад, у Канцэпцыю Праграмы сацыяльна-эканамічнага развіцця Рэспублікі Беларусь на 2026-2030 гады закладзены нацыянальныя прыярытэты. Сярод іх – фарміраванне здаровай нацыі, узмацненне традыцыйных каштоўнасцей, удасканаленне сістэмы адукацыі, стварэнне ўзорнай інфраструктуры, дасягненне тэхналагічнага суверэнітэту і забеспячэнне нацыянальнай бяспекі, развіццё патэнцыялу рэгіёнаў.
— Будучыня Беларусі – гэта агульная справа, і рашэнні, якія прымаюцца на Усебеларускім народным сходзе, датычацца кожнага з нас, – звярнуўся да працоўнага калектыву ААТ «Нафтан» дэлегат. – Вашы ідэі, ваш вопыт, энтузіязм і прафесіяналізм – гэта тое, што патрэбна нашай краіне. Я заклікаю вас актыўна ўдзельнічаць у абмеркаванні і рэалізацыі нашых планаў, дзяліцца сваімі думкамі і прапановамі, каб разам мы пабудавалі моцную, незалежную і квітнеючую Беларусь. Разам мы зможам дасягнуць большага!
Паводле матэрыялаў газеты "Вестник Нафтана"
