Усебеларускі народны сход Час выбраў нас!

Падзеі

Праект указа па выключэнні нядобрасумленнага пасрэдніцтва дапрацуюць і ўнясуць на разгляд Прэзідэнта ў красавіку

Праект указа па пытаннях закупак і выключэнні неабгрунтаванага і нядобрасумленнага пасрэдніцтва будзе дапрацаваны і ўнесены на разгляд Прэзідэнта Беларусі ў сярэдзіне красавіка бягучага года. Аб гэтым па выніках нарады ў кіраўніка дзяржавы заявіў журналістам намеснік старшыні Усебеларускага народнага сходу Аляксандр Косінец, перадае карэспандэнт БЕЛТА.

Аляксандр Косінец на чале групы спецыялістаў па даручэнні Прэзідэнта апошнім часам працаваў над адпаведнымі пытаннямі. Вынікам стаў праект указа, разгледжаны на нарадзе ў кіраўніка дзяржавы. У ім прапанаваны шэраг мер па ўдасканаленні існуючай нарматыўнай базы.

"Існуючая заканадаўчая база, мерапрыемствы, якія прымаюцца ўрадам, пастановы, планы ў пэўнай ступені працуюць. Але разам з тым не даюць жаданага выніку, таму што наша сацыяльна-эканамічнае развіццё церпіць вялікі ўрон у выніку нядобрасумленнага пасрэдніцтва, - сказаў ён. - Кіраўніком дзяржавы пастаўлена задача да 15 красавіка падрыхтаваць усёабдымны ўказ аб неадкладных мерах па ўстараненні нядобрасумленнага і неабгрунтаванага пасрэдніцтва".

Дакумент будзе ўключаць у сябе шэраг напрамкаў. Перш за ўсё неабходна скарэкціраваць заканадаўчыя аспекты. "Трэба сур'ёзна перапрацаваць закон ад 2012 года аб закупках, дапоўніць яго, істотна перагледзець арганізацыйныя пытанні, якія датычацца яго рэалізацыі", - заявіў Аляксандр Косінец.

Ён растлумачыў, што нормы дзеючага закона датычацца толькі дзяржаўных закупак, а не закупак за кошт уласных сродкаў арганізацый і прадпрыемстваў. Між тым, 90 працэнтаў усіх карупцыйных праяў і парушэнняў у сферы закупак выяўляюцца менавіта пры аплаце ўласнымі сродкамі.

"Мы ўдзелім пільную ўвагу тым брэшам, якія ёсць у заканадаўстве", - падкрэсліў намеснік Старшыні УНС.

Яшчэ адзін напрамак - арганізацыйныя мерапрыемствы, якія датычацца перш за ўсё актуалізацыі і вядзення каталога работ і паслуг. Дзеючы варыянт устарэў. Адпаведны каталог патрэбны, каб у штодзённым рэжыме бачыць, якія ёсць магчымасці і прапановы на рынку, і не плаціць утрая даражэй нядобрасумленным пасрэднікам.

Аляксандр Косінец звярнуў увагу і на такі аспект, што часам пасрэдніцтва ідзе ад самога спажыўца, які можа быць у змове з пастаўшчыком. "Мы ўдзелім гэтаму пытанню пільную ўвагу. Таксама рэестру нядобрасумленных пасрэднікаў, з якімі мы не павінны мець абсалютна ніякіх адносін і не дапускаць на наш рынак", - заявіў ён.

У праекце ўказа будуць прадугледжаны і меры ў фінансава-эканамічнай сферы, накіраваныя на выключэнне неабгрунтаванага пасрэдніцтва. Таксама як і шэраг іншых мерапрыемстваў, якія датычацца пытанняў імпарту, персанальнай адказнасці.

"У канчатковым выніку ён прынясе велізарную карысць, дасць адчувальны эфект для сацыяльна-эканамічнага развіцця Беларусі. Бо рост сабекошту прадукцыі (у выніку неабгрунтаванага пасрэдніцтва. - Заўвага БЕЛТА) кладзецца на кішэнь грамадзян, зніжае канкурэнтаздольнасць тавараў. Да 15 красавіка дакумент будзе падрыхтаваны і пакладзены на стол Прэзідэнту", - рэзюмаваў Аляксандр Косінец.

Асобным пытаннем на нарадзе ў кіраўніка дзяржавы стаў праект указа па цэнтралізацыі закупак асобных тавараў для вёскі. Прэзідэнт выказаў пункт гледжання аб тым, што пералік прадукцыі, якая будзе цэнтралізавана закупляцца для сельскай гаспадаркі, трэба пашырыць. Па выніках нарады было прынята рашэнне ўключыць нормы гэтага ўказа ў адзіны комплексны дакумент, аб чым журналістам расказаў міністр сельскай гаспадаркі і харчавання Юрый Горлаў.

Кіраўнік Мінсельгасхарча звярнуў увагу, што неабгрунтаванае пасрэдніцтва прыводзіць да значнага росту цэн на тавары. У якасці прыкладу ён прывёў гербіцыды і запчасткі для тэхнікі. Завышаная цана ў канчатковым выніку прыводзіць да росту сабекошту айчыннай прадукцыі. "Кошт аднаго і таго ж тавару ў тым жа самым аб'ёме і з тымі ж умовамі пастаўкі адрозніваецца больш як у два разы. Гэта што датычыцца сродкаў аховы раслін. Калі гаварыць пра запчасткі, то цэны адрозніваюцца ў пяць або шэсць разоў. Вядома, гэта недапушчальна і ўплывае на сабекошт нашай прадукцыі", - падкрэсліў Юрый Горлаў.

Указ, які будзе ўнесены на разгляд Прэзідэнту, дасць магчымасць значна знізіць сабекошт прадукцыі ў тым ліку і сельскай гаспадаркі, лічыць кіраўнік Мінсельгасхарча. "Для нашай галіны, для вытворцаў прадуктаў харчавання гэта вельмі актуальна. Мы з'яўляемся экспартна-арыентаванай краінай, і сабекошт выпускаемай прадукцыі трэба зніжаць, - канстатаваў ён. - Мы прадаём малочную і мясную прадукцыю на экспарт і бачым, як складваецца сабекошт канкрэтнай прадукцыі ў тых ці іншых краінах. У гэтай частцы ёсць рэзервы".

Гэты нарматыўна-прававы дакумент стане своеасаблівай інструкцыяй, якая забяспечыць значна большую празрыстасць закупак. Разам з тым, дадаў Юрый Горлаў, не трэба ставіць у строгія рамкі нашых вытворцаў, пакупнікоў, прадаўцоў. "Павінна быць пэўная мабільнасць. Але ўсё павінна быць празрыста, адкрыта і даступна", - рэзюмаваў міністр.-0-