Усебеларускі народны сход – гарант палітычнай стабільнасці і суверэнітэту

Галоўная / Медыя / Падзеі
Падзеі

Па ўсёй краіне напярэдадні Дня народнага адзінства праходзіць Рэспубліканская акцыя «Беларусь адзіная»

26.08.2025
Па ўсёй краіне напярэдадні Дня народнага адзінства праходзіць Рэспубліканская акцыя «Беларусь адзіная»

Рэспубліканская інфармацыйна-асветная акцыя «Беларусь адзiная» стартавала ў г.Барысаве 26 жніўня. Тэматыка акцыі ў гэтым годзе – «Беларусь – стратэгія будучыні».

У час акцыі абмяркоўваюцца многія актуальныя грамадскія і палітычныя пытанні. Штогадовы форум традыцыйна прыцягвае пільную ўвагу прадстаўнікоў працоўных калектываў, грамадскіх арганізацый, партый, ідэалагічнага звяна і моладзі.

Дэлегат сёмага Усебеларускага народнага сходу, дэпутат Палаты прадстаўнікоў Нацыянальнага сходу Рэспублікі Беларусь, член Пастаяннай камісіі па правах чалавека, нацыянальных адносінах і сродках масавай інфармацыі Вадзім ГІГІН адзначыў, што ў ходзе гэтага мерапрыемства ажыццяўляецца прадметная размова па хвалюючых грамадства пытаннях, абмеркаванне дасягненняў, перспектыў развіцця краіны, усяго таго, на што арыентуе Прэзідэнт.

– Калі вы пагледзіце гісторыю акцыі, пачынаючы з 2021 года відаць, як змяняецца нерв або тэматыка грамадскага жыцця ў гэты перыяд, калі мы звяраем гадзіннікі. У 2021 годзе гаварылі пра надзённыя палітычныя пытанні. Потым рабілі акцэнт на гістарычнай тэматыцы, на нейкіх знешнепалітычных або ваенна-палітычных тэмах.

 Цяпер гаворым пра будучыню, пра стратэгію будучыні, гаворым пра праграму развіцця Беларусі. І гэта вельмі сімвалічна, таму што на тыя тэзісы, сэнсы, якія артыкулююцца ў ходзе акцыі «Беларусь адзіная», затым арыентуецца і наш грамадска-палітычны актыў, нашы актывісты, патрыятычныя сілы.

Галоўная тэма акцыі — нацыянальная бяспека, лічыць дэлегат сёмага Усебеларускага народнага сходу, намеснік старшыні Пастаяннай камісіі па нацыянальнай бяспецы Палаты прадстаўнікоў Нацыянальнага сходу Руслан КАСЫГІН. Гэта тэма застаецца прыярытэтнай, і яе захаванне — адна з галоўных задач на сёння.

 Ва ўмовах палітычных пагроз прынцыпова важна забяспечыць у Беларусі мір і спакой. Асаблівую ролю ў гэтым адыгрывае сілавы блок, а менавіта Узброеныя Сілы.

— Калі распаўся Савецкі Саюз, адзін час многія палітычныя і грамадскія дзеячы гаварылі: Узброеныя Сілы Беларусі не патрэбны, іх трэба скарачаць, і тэрміновая служба не патрэбна. Практычна знішчаўся афіцэрскі корпус. Прыйшоўшы да ўлады, наш Прэзідэнт спыніў гэта, таму сёння мы і гаворым пра Узброеныя Сілы краіны як пра моц, фактар стратэгічнага стрымлівання і недапушчэння агрэсіі з боку іншых дзяржаў. Пры развязванні любой агрэсіі мы здольны яе адбіць, нанесці праціўніку непрымальны ўрон, аднавіць, калі неабходна, тэрытарыяльную цэласнасць і завяршыць вайну на выгадных для нас умовах.

Акцыя «Беларусь адзіная» – гэта грамадска-палітычнае мерапрыемства, якое праводзіцца ў Беларусі з 2021 года ў мэтах кансалідацыі патрыятычных сіл, абмеркавання актуальных пытанняў і пашырэння дасягненняў суверэннай Беларусі. У рамках акцыі праводзяцца адкрытыя дыялогі з удзелам лідараў вялікіх грамадскіх аб’яднанняў краіны, такіх як Федэрацыя прафсаюзаў, «Белая Русь», БРСМ, Беларускі саюз жанчын і Беларускае грамадскае аб’яднанне ветэранаў.

Акцыя праходзіць па рэгіёнах краіны ў наступным парадку: Мінская вобласць — 26 жніўня, Гродзенская вобласць — 28 жніўня, Гомельская вобласць — 4 верасня, г.Мінск — 5 верасня, Магілёўская вобласць — 8 верасня, Віцебская вобласць — 10 верасня, Брэсцкая вобласць — 12 верасня.

Паводле матэрыялаў БЕЛТА і «СБ. Беларусь сегодня».