Дэлегаты Усебеларускага народнага сходу – члены Савета Рэспублікі Нацыянальнага сходу Рэспублікі Беларусь прынялі актыўны ўдзел у дабрачыннай акцыі «Збяром партфель першакласніку», якая традыцыйна праводзіцца напярэдадні пачатку новага навучальнага года па ўсёй краіне і накіравана на аказанне дапамогі дзецям са шматдзетных, малазабяспечаных сем'яў, дзецям, якія знаходзяцца ў сацыяльна небяспечным становішчы, дзецям-сіротам і дзецям-інвалідам. У акцыю ўключаны не толькі дзеці, якія паступаюць у 1 клас, але і ўсе, хто аказаўся ў цяжкай жыццёвай сітуацыі.
У рамках гэтай дабрачыннай акцыі Старшыня Пастаяннай камісіі па заканадаўстве і дзяржаўным будаўніцтве Міхаіл РУСЫ прыехаў з падарункамі, школьнымі прыладамі і віншаваннямі да шматдзетных сем'яў у г.Тураў.
Уручаючы падарункі, парламентарый адзначыў: «Дзеці – гэта аснова асноў. Гэта капітал, той, які закладваецца цяпер. Гэта наша будучыня. Гэта святое. Якой будзе сям'я, якімі дзеці – такой будзе і дзяржава, і асновы. Няхай тут заўсёды будзе святло, цяпло, дабро і поспех».
Член Пастаяннай камісіі па міжнародных справах і нацыянальнай бяспецы, начальнік установы «Віцебскае абласное ўпраўленне МНС Рэспублікі Беларусь» Сяргей МЯЛЕШКІН таксама прыняў удзел у гэтай акцыі. Ён уручыў партфель для трэцякласніцы з г.п. Шаркаўшчына, у якім былі сабраны неабходныя для вучэбнага працэсу канцылярскія прылады і розныя развіваючыя дапаможнікі, у тым ліку па бяспецы жыццядзейнасці.
«Дабрачынная ініцыятыва па зборы школьных тавараў для дзяцей са шматдзетных, малазабяспечаных сем'яў і дзяцей сірот – гэта выдатны спосаб не застацца ўбаку і аказаць пасільную дапамогу ў падрыхтоўцы дзяцей да школы тым сем'ям, дзе рады любой падтрымцы. У Беларусі выхаванню і развіццю дзяцей удзяляецца асаблівая ўвага. Нашы дзеці – гэта стратэгічны патэнцыял далейшага развіцця і працвітання краіны», – сказаў дэлегат сёмага Усебеларускага народнага сходу.
У ходзе ўдзелу ў гэтай акцыі член Пастаяннай камісіі па рэгіянальнай палітыцы і мясцовым самакіраванні, дырэктар ААТ «Жураўлінае» Аляксандр ПІШЧ павіншаваў бацькоў і першакласнікаў з надыходзячым Днём ведаў.
«Я з вялікай павагай стаўлюся да акцыі «Збяром партфель першакласніку». У наш час, калі доступ да якаснай адукацыі з'яўляецца адным з ключавых фактараў паспяховай будучыні нашых дзяцей, такія акцыі набываюць асаблівую значнасць. Падтрымка першакласнікаў – гэта не проста дапамога ў набыцці школьных прылад, гэта інвестыцыя ў іх упэўненасць, у іх імкненне да ведаў, у іх будучыню. Разам мы можам зрабіць старт у школьнае жыццё для кожнага дзіцяці больш радасным і поўным магчымасцей», – адзначыў сенатар.
Член Пастаяннай камісіі па міжнародных справах і нацыянальнай бяспецы, старшыня Гомельскай абласной арганізацыі рэспубліканскага грамадскага аб'яднання «Беларускае таварыства Чырвонага Крыжа» Ала СМАЛЯК у рамках дабрачыннай кампаніі «Збяром дзяцей у школу» ўручыла школьныя партфелі першакласнікам г.Гомеля.
«Заўсёды памятайце, што ў нашай краіне, у нашай любімай Беларусі для вас, дзеці, адкрыты ўсе дарогі, створаны ўсе ўмовы, каб вашы таленты, здольнасці раскрываліся як мага ярчэй, каб вы змаглі дабіцца пастаўленых мэт, увасобіць у жыццё свае мары, рэалізаваць увесь свой патэнцыял на карысць роднай зямлі», – адзначыла дэлегат.
Член Пастаяннай камісіі па рэгіянальнай палітыцы і мясцовым самакіраванні, дырэктар ААТ «Ціхінічы» Рагачоўскага раёна Юрый ВАСІЛЬЦОЎ сустрэўся з маленькімі жыхарамі рэгіёна і паўдзельнічаў у забаўляльна-гульнявой праграме «Першакласнае шоу», уручыўшы будучым першакласнікам школьныя партфелі.
«Усе нашы беларускія дзеці павінны ведаць, што наш Прэзідэнт і ўся краіна аб іх клапоцяцца і ніхто не застанецца без увагі, таму што нашы дзеці – паўнапраўныя грамадзяне слаўнай Беларусі і яе ўпэўненая будучыня», – адзначыў парламентарый.
Наталля ГЛІНСКАЯ, член Пастаяннай камісіі па адукацыі, навуцы, культуры і сацыяльным развіцці, дырэктар ДУА «Маладзечанская спецыяльная школа-інтэрнат» далучылася да акцыі «Збяром партфель разам». Яна наведала ў в.Чэхаўшчына шматдзетную сям'ю Сакалоўскіх, у якой выхоўваецца чацвёра дзяцей, уручыла памятныя падарункі, канцылярскія прылады для падрыхтоўкі дзяцей да новага навучальнага года і падзякавала бацькам за іх адказную працу:
«Першае верасня для дзіцяці – гэта рубеж, за якім пачынаецца новая, значная частка жыцця. Паспяховая падрыхтоўка да школы – гэта закладка фундаменту, на якім будзе будавацца ўсё далейшае навучанне, сацыяльная адаптацыя і стаўленне дзіцяці да свету ведаў», – адзначыла сенатар.
У гэтай акцыі таксама ўдзельнічалі і іншыя дэлегаты сёмага Усебеларускага народнага сходу, члены Савета Рэспублікі Нацыянальнага сходу Рэспублікі Беларусь, у тым ліку Кацярына Зянкевіч, Эдуард Гаўрылковіч, Ірына Абельская, Андрэй Крываносаў, Ксенія Панцюхова.
Паводле матэрыялаў сайта Савета Рэспублікі Нацыянальнага сходу Рэспублікі Беларусь.