Усебеларускі народны сход – гарант палітычнай стабільнасці і суверэнітэту
Падзеі
Матываваная, адукаваная, актыўная моладзь — гэта стратэгічны рэсурс развіцця краіны
У рамках праведзенага ў Міністэрстве юстыцыі семінара-нарады з маладзёжным актывам была арганізавана сустрэча з дэлегатамі сёмага Усебеларускага народнага сходу Міністрам юстыцыі Яўгенам Каваленкам і першым сакратаром Цэнтральнага камітэта грамадскага аб'яднання «Беларускі рэспубліканскі саюз моладзі» Аляксандрам Лук'янавым.
У сваім уступным слове Міністр адзначыў, што такі фармат камунікацыі садзейнічае эфектыўнаму ўзаемаразуменню: дазваляе маладым работнікам лепш засвоіць актуальныя патрабаванні і задачы, а кіраўніцтву — глыбей азнаёміцца з патрэбнасцямі маладых спецыялістаў і аказаць садзейнічанне ў вырашэнні праблем. Яўген Каваленка падкрэсліў, што Міністэрства юстыцыі — маладое ведамства, бо моладзь складае каля трэці работнікаў галіны.
У сваю чаргу, Аляксандр Лук'янаў станоўча ацаніў падыход кіраўніцтва да работы з маладымі спецыялістамі. Ён таксама адзначыў высокі ўзровень узаемадзеяння работнікаў галіны з саюзам моладзі, асабліва ў сферы прававой асветы.
У ходзе мерапрыемства адбылася цырымонія ўзнагароджання членаў пярвічнай арганізацыі ГА «БРСМ» Міністэрства юстыцыі, якія прымаюць актыўны ўдзел у рэалізацыі дзяржаўнай маладзёжнай палітыкі.
Запрошаным спікерам інфармацыйнай сустрэчы стаў дэлегат сёмага Усебеларускага народнага сходу, дэпутат Мінскага гарадскога Савета дэпутатаў, генеральны дырэктар дзяржаўнай установы «Нацыянальны акадэмічны тэатр імя Янкі Купалы» Аляксандр Шастакоў. Яго выступленне атрымала высокую ацэнку аўдыторыі і выклікала станоўчы водгук у прысутных.
У заключнай частцы мерапрыемства для ўдзельнікаў семінара-нарады была праведзена аглядная экскурсія па тэматычнай дакументальнай выстаўцы, прымеркаванай да Дня народнага адзінства. Экспазіцыя выстаўкі ўключае два асноўныя раздзелы: тэматычныя банеры і вітрынныя комплексы з копіямі архіўных дакументаў з фондаў Нацыянальнага архіва Рэспублікі Беларусь і Беларускага дзяржаўнага архіва кінафотафонадакументаў.
Паводле матэрыялаў сайта Міністэрства юстыцыі Рэспублікі Беларусь.
