Усебеларускі народны сход Час выбраў нас!

Падзеі

Аляксандр Лукашэнка ў Дзень Незалежнасці ўсклаў вянок да падножжа Кургана Славы

Прэзідэнт Беларусі, Старшыня Усебеларускага народнага сходу Аляксандр Лукашэнка 3 ліпеня прыняў удзел ва ўрачыстых мерапрыемствах, прысвечаных Дню Незалежнасці Рэспублікі Беларусь, перадае карэспандэнт БЕЛТА.

Кіраўнік дзяржавы ўсклаў вянок да падножжа Кургана Славы, пасля яго кветкі да мемарыяла ўсклалі вышэйшыя службовыя асобы краіны.

Ва ўрачыстай цырымоніі таксама прынялі ўдзел ветэраны, прадстаўнікі працоўных калектываў і грамадскіх аб'яднанняў, удзельнікі ваенна-патрыятычных клубаў і маладзёжных арганізацый.

"Сёння мы - мільёны беларусаў - адзначаем галоўнае дзяржаўнае свята нашай любімай Радзімы. Сустракаем яго летняй раніцай у святым месцы, сярод выспяваючых палёў Міншчыны, без страху гледзячы ў роднае сіняе неба. Перакананы, што для большасці беларусаў свята азначае мір", - падкрэсліў Кіраўнік дзяржавы.

Аляксандр Лукашэнка адзначыў, што вызваленне сталіцы Беларусі 3 ліпеня 1944 года ў ходзе аперацыі "Баграціён" вярнула гэты мір на зраненую беларускую зямлю і стала важным этапам на шляху да Вялікай Перамогі. "Менавіта тут, на подступах да сэрца Радзімы, самкнулася кола "Мінскага катла" вакол групоўкі фашыстаў, пасля разгрому якой за лічаныя тыдні была вызвалена ўся Беларусь," - нагадаў беларускі лідар.

"Сёння па волі народа гэту знакавую дату Вялікай Айчыннай вайны мы святкуем у Дзень Незалежнасці. І аддаём даніну памяці тым, хто загінуў смерцю храбрых за наша мірнае сучаснае. Мы ўспамінаем ахвяр вайны і ўшаноўваем нашых дарагіх ветэранаў вайны і працы, чые стойкасць, мужнасць і любоў да Радзімы будуць заўсёды прыкладам для нас і будучых пакаленняў. Нізкі паклон і вечная слава ўсім, хто загінуў за свабоду і незалежнасць роднай Беларусі", - сказаў Аляксандр Лукашэнка.

Удзельнікі мерапрыемства ўшанавалі памяць загінулых мінутай маўчання.
Курган Славы Савецкай арміі - помнік у гонар подзвігу воінаў 1-га, 2-га, 3-га Беларускіх і 1-га Прыбалтыйскага франтоў, якія ўдзельнічалі ў Беларускай наступальнай аперацыі "Баграціён". У раёне, дзе сёння размешчаны мемарыяльны комплекс, ішлі бязлітасныя баі за вызваленне Беларусі. Тады ў акружэнне савецкіх войскаў трапіла 105-тысячная групоўка гітлераўскіх войскаў. Гэта падзея атрымала назву "Мінскі кацёл".

Курган Славы быў закладзены 30 верасня 1966 года. Сюды лягла зямля з гарадоў-герояў Савецкага Саюза і іншых мясцін, якія былі праслаўлены працоўнымі і ратнымі подзвігамі. У той час кожны лічыў за гонар прынесці жменю зямлі для стварэння манумента і аддаць частачку свайго сэрца пераможцам. Адкрылі мемарыял 5 ліпеня 1969 года.

Паводле матэрыялаў БЕЛТА