Завяршэнне падрыхтоўкі праекта прагнозу сацыяльна-эканамічнага развіцця Беларусі на 2026 год стала адной з галоўных тэм абмеркавання на пасяджэнні Прэзідыума Савета Міністраў 20 жніўня 2025 г.
Паводле слоў Прэм’ер-міністра Беларусі Аляксандра Турчына, на пасяджэнні фактычна фіналізуецца падрыхтоўка праектаў прагнозу сацыяльна-эканамічнага развіцця, мэтавых паказчыкаў грашова-крэдытнай палітыкі і рэспубліканскага бюджэту на 2026 год перад накіраваннем іх Кіраўніку дзяржавы.
– Мэтай нашай эканамічнай палітыкі з’яўляецца ўстойлівы і галоўнае – збалансаваны рост эканомікі. Таму прагназаванне з’яўляецца важнейшай нашай задачай. Мы павінны ўлічваць магчымыя рызыкі і негатыўныя сцэнарыі, наколькі гэта магчыма, таму што нечаканасцей у нашым сучасным свеце шмат. Прынамсі, пэўныя базавыя параметры трэба дакладна для сябе разумець, будаваць рэалістычныя планы і патрабаваць безумоўнага іх выканання, – адзначыў Аляксандр Турчын.
Міністр эканомікі Юрый Чабатар звярнуў увагу, што на пасяджэнні Прэзідыума Урада разглядаецца фактычна заключны этап цэласнага планавання і прагназавання развіцця Беларусі на наступны год. «У гэтым годзе мы прайшлі вялікі шлях. Мы адобрылі Нацыянальную стратэгію ўстойлівага развіцця, канцэпцыю Праграмы сацыяльна-эканамічнага развіцця на будучую пяцігодку, дзяржаўныя праграмы. Сёння мы ўжо разглядаем праект прагнозу сацэканамразвіцця на 2026 год, таму ў нас у гэтым годзе сфарміруюцца комплекснае ўяўленне аб развіцці краіны на будучую пяцігодку і ўся сістэма дакументаў пад гэтыя задачы і мэты», – падкрэсліў ён.
Як адзначыў кіраўнік эканамічнага ведамства, асноўныя параметры развіцця сфарміраваны з улікам знешніх і ўнутраных фактараў і сінхранізаваны з Праграмай сацыяльна-эканамічнага развіцця краіны на 2026 – 2030 гады. Рост ВУП запланаваны на ўзроўні 2,8 %, інвестыцый – на 3,1 %, экспарту – на 3,7 %.
«Такая дынаміка будзе забяспечана як за кошт рэальнага сектара, так і за кошт рэалізацыі патэнцыялу сферы паслуг, у першую чаргу турызму і IT. Для гэтага прадугледжаны шэраг стымулюючых мер па развіцці неабходнай інфраструктуры. Экспартная стратэгія нацэлена на павелічэнне паставак тавараў і паслуг на 3,7 %. Акцэнт – на апераджальны рост паслуг. Безумоўным прыярытэтам застаецца зніжэнне залежнасці ад аднаго рынку. Для гэтага прадоўжым работу па нарошчванні продажаў у краіны СНД і «далёкай дугі». Пры гэтым мы нацэлены захаваць сваю прысутнасць на ключавым для нас расійскім рынку», – падкрэсліў Юрый Чабатар.
Кіраўнік эканамічнага ведамства таксама расказаў аб інвестыцыйных планах.
«Прыярытэтнымі напрамкамі інвестыцый застаюцца будаўніцтва жылля, у тым ліку арэнднага, развіццё сацыяльнай і транспартнай інфраструктуры. Дзве трэці ад агульнага запланаванага аб’ёму інвестыцый пойдзе на рэалізацыю камерцыйных праектаў і тэхперааснашчэнне прадпрыемстваў. Сфарміраваны пул з больш як 600 інвестыцыйных праектаў. Прадугледжана рэалізацыя больш як 10 вялікіх інвестпраектаў, каля 100 праектаў «Рэгіянальнай ініцыятывы», завяршэнне пачатых папярэднія гады праектаў канцэпцыі «Адзін раён – адзін праект», а таксама інтэграцыйных і імпартазамяшчальных: гэта яшчэ каля 120 праектаў», – адзначыў Юрый Чабатар.
– Мы палепшылі ўсе асноўныя праграмы крэдытавання на наступны год. «Рэгіянальная ініцыятыва» будзе крэдытавацца пад ужо 7 % на 7 гадоў. Гэта паляпшэнне ў параўнанні з бягучым годам. І мы ўкараняем асаблівыя прадукты для нашых напрамкаў. Напрыклад, стварылі крэдытны прадукт для сферы турызму пад 6 %, каб будаваць сродкі размяшчэння, – падзяліўся Юрый Чабатар. – Яшчэ адзін напрамак – гэта павышэнне эфектыўнасці і прадукцыйнасці прамысловасці за кошт рабатызацыі. Для ўкаранення робатаў, вытворчасці ўласных робататэхнічных комплексаў ёсць таксама крэдытны прадукт пад 6 %.
Чакаецца, што выкананне вытворчай, інвестыцыйнай і экспартнай праграм дасць магчымасць забяспечыць у 2026 годзе рост рэальных даходаў насельніцтва на 4,8%.
Паводле матэрыялаў БЕЛТА і інтэрнэт-сайта Мінэканомікі.