Усебеларускі народны сход – гарант палітычнай стабільнасці і суверэнітэту
Падзеі
Аб нашым “зялёным золаце” і не толькі
Міністр лясной гаспадаркі, дэлегат Усебеларускага народнага сходу Аляксандр Кулік правёў сустрэчу з працоўным калектывам Пінскага лясгаса і азнаёміўся з яго работай.
У ходзе сустрэчы ён расказаў аб дасягненнях суверэннай Беларусі за апошнія дзесяцігоддзі.
- Да сваёй незалежнасці наша краіна прайшла нялёгкі шлях. Яшчэ складаней давялося ў гады станаўлення маладой беларускай дзяржавы. Але сёння мы бачым, які ўражальны рост дасягнуты па ўсіх галінах. Напрыклад, калі ўзяць лясы, наша “зялёнае золата”, то за гады незалежнасці плошча зямель ляснога фонду павялічылася практычна на 1 млн га, а лясістасць дасягнула рэкорднага паказчыка 40,3%. Гэта вынік правільнай дзяржаўнай палітыкі і цяжкай карпатлівай працы лесаводаў, - расказаў Аляксандр Кулік.
У рамках візіту ў рэгіён кіраўнік лясной галіны наведаў таксама сям’ю Козелаў, якая стала нядаўна героем публікацыі ў газеце «СБ.Беларусь Сегодня».
Дружная сям’я, у якой сёння растуць двое дзяцей, плануе заняцца аграэкатурызмам. Для гэтага набыла на першапачатковым этапе адразу 2 гатовыя домакамплекты ад беларускіх лясгасаў.
Дэлегат Усебеларускага народнага сходу ўважліва распытаў сям’ю аб цяжкасцях у будаўніцтве аграэкасядзібы.
Аляксандр Кулік азнаёміўся таксама з работай дрэваапрацоўчага цэха Пінскага лясгаса.
У хуткім часе тут маюць намер пашырыць вытворчасць: набыць новую лінію лесапілавання. Гэта, у сваю чаргу, дасць магчымасць уключыць у перапрацоўку дадатковы рэсурс і ўмацаваць фінансавы стан Пінскага лясгаса. Таксама плануецца завяршыць асфальтаванне тэрыторыі, абсталяваць дадатковыя навесы для захоўвання прадукцыі, арганізаваць пляцоўку для паркоўкі аўтамабіляў.
У ходзе сустрэчы з працоўным калектывам Пінскага лясгаса Міністр лясной гаспадаркі падкрэсліў: Пінскі лясгас – у ліку стабільна працуючых устаноў.
- Перспектывы для развіцця ў Пінскага лясгаса ёсць, - адзначыў Аляксандр Кулік і заклікаў ставіць перад сабой смелыя задачы і рухацца наперад.
Паводле матэрыялаў прэс-службы Міністэрства лясной гаспадаркі
