Усебеларускі народны сход Час выбраў нас!

Падзеі

"Дзяржава для народа". 20 гадоў таму адбыўся ІІІ Усебеларускі народны сход

Роўна 20 гадоў таму, 2-3 сакавіка 2006 года, у Мінску адбыўся ІІІ Усебеларускі народны сход, дэлегатамі якога сталі 2,5 тыс. чалавек, паведамляе БЕЛТА.

Да УНС краіна падышла з дастойнымі рэзультатамі, выканаўшы важнейшыя паказчыкі Праграмы сацыяльна-эканамічнага развіцця на 2001-2005 гады. Усё, аб чым дамаўляліся на ІІ Усебеларускім народным сходзе, рэалізавана і ўвасоблена ў жыццё.
Прэзідэнт Беларусі Аляксандр Лукашэнка ў сваім дакладзе звяртаў увагу, што выпрацаваны курс развіцця краіны аказаўся правільным. Пацвярджэнне гэтаму - высокія тэмпы эканамічнага росту. "Ідучы ад жыцця, мы выпрацавалі сваю ўласную мадэль развіцця, заснаваную на ўзважаных, прадуманых, эвалюцыйных пераўтварэннях", - адзначаў кіраўнік дзяржавы, тлумачачы прычыны поспеху.

Згодна з асноўнымі вынікамі сацыяльна-эканамічнага развіцця краіны за пяцігодку, жыццёвы ўзровень насельніцтва значна павысіўся, змянілася да лепшага структура спажывецкіх расходаў. У Беларусі не толькі захавалі, але і ўмацавалі сістэму дзяржаўнай сацыяльнай падтрымкі розных катэгорый насельніцтва.
Стабільны рост прадоўжыў валавы ўнутраны прадукт. У 2005 годзе на развіццё эканомікі і сацыяльнай сферы дзяржава накіравала амаль у два разы больш сродкаў, чым у пачатку пяцігодкі ў 2000 годзе. Капітальныя ўкладанні і інвестыцыі, што накіроўваліся ў сельскую гаспадарку, - павялічыліся амаль у 4 разы, у прамысловасць - у 2 разы, у транспарт - у 2 разы, у жыллёвае будаўніцтва - амаль у 1,5 раза.

У новай пяцігодцы на першы план вылучалася задача кардынальнага павышэння якасці жыцця людзей. Яе вырашэнне не зводзілася толькі да росту зарплат. Размова ішла таксама аб жыллі, адукацыі, даступнай медыцынскай дапамозе, дзіцячых садах, гарантаваных рабочых месцах, бяспецы грамадзян і інш. Было вызначана, што новы этап дзяржаўнага будаўніцтва будзе праходзіць пад лозунгам "Дзяржава для народа, для чалавека".
Удзельнікі трэцяга Усебеларускага народнага сходу адобрылі Праграму сацыяльна-эканамічнага развіцця Беларусі на 2006-2010 гады і прынялі адпаведную рэзалюцыю.

У рэзалюцыі выказана падтрымка прапанаваным кіраўніцтвам краіны дзяржаўным прыярытэтам. У іх ліку - усебаковае гарманічнае развіццё чалавека на аснове павышэння рэальных грашовых даходаў, інавацыйны шлях развіцця эканомікі, энерга- і рэсурсазберажэнне, нарошчванне экспартнага патэнцыялу на аснове павышэння канкурэнтаздольнасці айчыннай прадукцыі, развіццё аграпрамысловага комплексу і сацыяльнае адраджэнне вёскі, жыллёвае будаўніцтва, сацыяльна-эканамічнае развіццё малых і сярэдніх гарадоў.
У 2006-2010 гады Беларусь узяла курс на праграмнае абнаўленне эканомікі, мадэрнізуючы не асобныя прадпрыемствы, а цэлыя галіны. За гэту пяцігодку, у прыватнасці, было мадэрнізавана больш за 320 прамысловых прадпрыемстваў, укаранёна звыш 500 новых тэхналогій. Беларусь заняла першае месца ў будаўніцтве жылля на аднаго жыхара сярод краін СНД, апярэдзіўшы і шэраг іншых краін свету.