Усебеларускі народны сход – гарант палітычнай стабільнасці і суверэнітэту
Падзеі
Беларусь і Кітай шануюць гістарычную памяць і не дапусцяць яе скажэння
Беларусь і Кітай шануюць гістарычную памяць і не дапусцяць яе скажэння. Аб гэтым заявіў Першы намеснік Прэм'ер-міністра Беларусі, дэлегат сёмага Усебеларускага народнага сходу Мікалай Снапкоў, выступаючы на адкрыцці кітайскай фотавыстаўкі з нагоды 80-годдзя Перамогі «Памятаючы аб мінулым, ствараць будучыню» ў Беларускім дзяржаўным музеі гісторыі Вялікай Айчыннай вайны.
Мікалай Снапкоў падкрэсліў, што гэта мерапрыемства мае асаблівае значэнне для Беларусі і Кітая. «Сёння мы аддаём даніну павагі подзвігу нашых народаў у барацьбе з германскім фашызмам і японскім мілітарызмам. І беларускі, і кітайскі народы заплацілі за Перамогу ў гэтай страшнай вайне вялізную цану, – адзначыў першы віцэ-прэм'ер. – Для Кітая вайна пачалася 18 верасня 1931 г. у горадзе Шэньян правінцыі Ляанін, для Беларусі і ўсяго СССР – праз 10 гадоў, 22 чэрвеня 1941 г. у Брэсцкай крэпасці-героі. Сімвалічна, што сёння правінцыю Ляанін і Брэсцкую вобласць звязваюць пабрацімскія адносіны».
«Мы свята шануем і беражліва захоўваем памяць аб салдатах, падпольшчыках і працаўніках тылу, якія больш за восемдзесят гадоў таму набліжалі агульную Перамогу. Мы з удзячнасцю ўспамінаем імёны кітайскіх падпольшчыкаў, якія змагаліся з фашыстамі ў Віцебску, і шануем герояў-беларусаў, якія аддалі свае жыцці ў барацьбе з японскімі агрэсарамі ў небе і на зямлі Кітая. Іх подзвіг у нашых краінах не будзе забыты», – прадоўжыў Мікалай Снапкоў.
«На жаль, жывых сведак тых страшных гадоў сёння становіцца ўсё менш. Менавіта таму так важны падобныя выстаўкі і мерапрыемствы – каб перадаваць з пакалення ў пакаленне памяць аб усіх жахах вайны, шанаваць светлую памяць сваіх продкаў, расказваць праўду аб падзеях тых гадоў, нікому не дазваляць перапісваць або скажаць гісторыю, абяляць злачынцаў і пляміць гонар сапраўдных герояў», – выказаў меркаванне першы віцэ-прэм'ер.
Ён нагадаў, што агульная гістарычная памяць пакладзена ў аснову рэзалюцыі Генасамблеі ААН «Васьмідзясятая гадавіна заканчэння Другой сусветнай вайны». Гэты дакумент прадугледжвае скліканне на рэгулярнай аснове спецыяльных пасяджэнняў Генасамблеі ў памяць аб ахвярах Другой сусветнай вайны.
«Беларусь і Кітай поплеч ідуць па шляху стварэння. З кожным годам наша супрацоўніцтва становіцца ўсё больш моцным і глыбокім. Зусім хутка Прэзідэнт Рэспублікі Беларусь будзе прымаць удзел у святочных мерапрыемствах у Пекіне, прысвечаных 80-годдзю перамогі над японскім мілітарызмам і заканчэння Другой сусветнай вайны», – звярнуў увагу Мікалай Снапкоў.
Ён выказаў упэўненасць, што выстаўка дазволіць кожнаму адкрыць для сябе новую грань гісторыі дружбы Беларусі і Кітая, якая сёння з'яўляецца асновай нашага паспяховага ўзаемадзеяння на міжнароднай арэне і пабудовы супольнасці адзінага лёсу.
Паводле матэрыялаў БЕЛТА.
