Усебеларускі народны сход – гарант палітычнай стабільнасці і суверэнітэту
Падзеі
Аляксей Кушнарэнка выбраны членам Прэзідыума УНС
Старшыня Мінскага аблвыканкама Аляксей Кушнарэнка выбраны членам Прэзідыума VII Усебеларускага народнага сходу (УНС). Адпаведныя вынікі тайнага галасавання дэлегатаў агучаны на пасяджэнні УНС 19 снежня.
Вакансія ў Прэзідыуме ўзнікла вясной бягучага года пасля кадравых змяненняў ва ўрадзе - Канстанцін Бурак быў назначаны памочнікам Прэзідэнта - інспектарам па Гродзенскай вобласці, у сувязі з чым страціў статус дэлегата УНС і члена Прэзідыума.
Прэзідыум УНС з'яўляецца пастаянна дзеючым калегіяльным органам, які падсправаздачны Сходу і забяспечвае аператыўнае вырашэнне пытанняў, якія ўваходзяць у кампетэнцыю УНС. Членамі Прэзідыума з'яўляюцца Старшыня УНС і яго намеснікі. Іншыя члены Прэзідыума выбіраюцца з ліку дэлегатаў УНС. Гранічная колькасць Прэзідыума УНС складае 15 чалавек.
У адпаведнасці з законам "Аб Усебеларускім народным сходзе" члены Прэзідыума выбіраюцца тайным галасаваннем. Аднак у ходзе вылучэння кандыдатуры Аляксея Кушнарэнкі кіраўнік беларускай дзяржавы і Старшыня УНС Аляксандр Лукашэнка адзначыў, што заканадаўства ў гэтых адносінах, магчыма, трэба падкарэкціраваць.
"Тое, што мы абавязкова павінны (правесці працэдуру тайнага галасавання за кандыдата. - Заўвага БЕЛТА), згодна з нашай дэмакратыяй, - ужо крытыкуюць мяне за гэта. Але пры чым тут я? Гэта ж вы прымалі рашэнне, што ўсе члены Прэзідыума УНС выбіраюцца тайным галасаваннем. Многія цяпер, нават Аляксандр Мікалаевіч (намеснік Старшыні УНС Аляксандр Косінец. - Заўвага БЕЛТА) гаворыць, што гэта можна было б рабіць і адкрытым галасаваннем, - сказаў Аляксандр Лукашэнка. - Атрымліваецца так, што члена Прэзідыўма тайна выбіраем, а далей мы будзем назначаць суддзяў Вярхоўнага і Канстытуцыйнага судоў - гэта адкрытым галасаваннем. Таму мы разгледзім, яшчэ раз вернемся да гэтага закона. І трэба падрэгуляваць, каб час сапраўды не губляць, неяк ураўнаважыць і збалансаваць сітуацыю".
Паводле матэрыялаў БЕЛТА
