Усебеларускі народны сход – гарант палітычнай стабільнасці і суверэнітэту
Падзеі
Аляксандр Лук'янаў: праектаў будучыні ў Беларусі нямала
17 ліпеня 2025 г. член Пастаяннай камісіі Савета Рэспублікі Нацыянальнага сходу Рэспублікі Беларусь па міжнародных справах і нацыянальнай бяспецы, першы сакратар Цэнтральнага камітэта ГА «БРСМ», дэлегат VII Усебеларускага народнага сходу Аляксандр Лук'янаў у рамках Адзінага дня інфармавання правёў сустрэчу з працоўным калектывам ААТ «Фірма «Кадзіна».
«Беларусь суверэнная: ад аднаўлення народнай гаспадаркі да інавацыйных праектаў будучыні» — вельмі важная тэма. У жыцці кожнай дзяржавы ёсць асаблівыя даты, якія становяцца пунктам адліку новага этапу гісторыі. Для Беларусі такой вяхой стала вызваленне Мінска ад нямецка-фашысцкіх захопнікаў. За тое, каб менавіта ў гэту дату святкаваць Дзень Незалежнасці, прагаласаваў наш народ на рэспубліканскім рэферэндуме ў 1996 годзе. Памятаць аб подзвігах ветэранаў, ведаць аб генацыдзе неабходна, урокі гісторыі вучаць нас па-сапраўднаму даражыць тым, што зроблена пакаленнямі тых гадоў. І, безумоўна, тым, што створана за апошнія дзесяцігоддзі, дзякуючы чаму краіна ператварылася ў сучасную дзяржаву, якая ўпэўнена ідзе па ўласным шляху развіцця», — падкрэсліў у сваёй прамове, дакладваючы па асноўнай тэме дня, Аляксандр Лук'янаў.
"Праектаў будучыні, якія маюць патэнцыял стаць пунктамі росту для нацыянальнай эканомікі, у Беларусі нямала: нацыянальны электратранспарт, біятэхналогіі ў аграпрамысловым комплексе, дакладнае земляробства, разумныя гарады, інавацыйная ахова здароўя, біятэхналогіі для фармацэўтыкі. Суверэнная Беларусь ужо заваявала космас, беларускі Парк высокіх тэхналогій стаў вядучым ІТ-кластарам у Цэнтральнай і Усходняй Еўропе. Яшчэ адзін маштабны ўнікальны праект — Беларуская нацыянальная біятэхналагічная карпарацыя, аналагаў якой няма нідзе. Беларуская атамная электрастанцыя стала брэндам, які забяспечвае энергетычную самастойнасць краіны. І, што немалаважна, БелАЭС выгадна не толькі эканамічна, але і экалагічна. Усё гэта дасягнута дзякуючы палітыцы нашага Прэзідэнта, яго максімальна вывераным, паслядоўным рашэнням», — адзначыў Аляксандр Лук'янаў.
Пасля завяршэння інфармацыйнай часткі Аляксандр Лук'янаў і 120 актывістаў ГА «БРСМ» адправіліся аказваць дапамогу Магілёўшчыне ў разборы завалаў пасля ўрагану.
